2 سوانیاں دی ہلاکت: ایچ آر سی پی دا عدالتی ٹربیونل دا مطالبہ۔

فیکٹ فائنڈنگ رپورٹ وچ سرکاری بیاناں دے تضاداں تے سوال چکّے گئے۔

لاہور (خبر نگار): لاہور دے ٹاؤن شپ تھانے وچ دو سوانیاں آمنہ تے انمول دی پولیس حراست وچ ہلاکت دے معاملے تے ہیومن رائٹس کمیشن آف پاکستان (ایچ آر سی پی) نے فیکٹ فائنڈنگ رپورٹ جاری کر دتی جیہدے وچ سرکاری بیاناں وچ تضاداں، پوسٹ مارٹم رپورٹاں وچ مماثلت تے سوانیاں دی حراست دوران لیڈی پولیس اہلکاراں دی مبینہ عدم موجودگی تے سوال چکّے نیں۔ کمیشن نے واقعے دی شفاف تحقیقات لئی آزاد عدالتی ٹربیونل قائم کرن دا مطالبہ کر دتا۔ ایچ آر سی پی مطابق پولیس نے آمنہ تے انمول نوں 4 اگست نوں مبینہ چوری دے الزام وچ حراست وچ لیا، پھر کجھ گھنٹیاں بعد دونوں دی ہلاکت ہو گئی۔ پولیس نے ابتدائی طور تے موت دی وجہ دل دا دورہ قرار دتی جدکہ حتمی پوسٹ مارٹم رپورٹاں ہلے تک زیر التوا نیں۔ دوجے پاسے اہلخانہ نے جسماں تے زخم دے نشاناں دا دعویٰ کیتا پر سرکاری ریکارڈ وچ بیرونی زخم دا ذکر نہیں۔ ایچ آر سی پی نے لاہور ہائیکورٹ دے حاضر سروس جج دی سربراہی وچ بااختیار عدالتی ٹربیونل بݨاوݨ تے جاں بحق دونوں سوانیاں دے اہلخانہ نوں تحفظ تے قانونی معاونت فراہم کرن دا وی مطالبہ کر دتا اے۔