فتنہ الہندوستان دہشتگرداں دی معاونت دے مزید ثبوت سامنے آ گئے۔
جدید طرز تے فلمائی گئی ویڈیو توں ظاہر ہو گیا کہ ایہناں نوں بیرونی فنڈنگ تے تکنیکی سپورٹ حاصل اے،
اسلام آباد (خصوصی نیوز رپورٹر): فتنہ الہندوستان دے دہشتگرداں نوں بیرونی سرپرستی تے مالی معاونت دے مزید ثبوت سامنے آ گئے، فتنہ الہندوستان دی سوشل میڈیا تے جدید طرز دی سینمیٹک ویڈیو نے کئی سچائیاں ظاہر کر دتیاں نیں۔ جدید ڈرون زومز، مختلف زاویئاں توں ریکارڈنگ، ہائی ڈیفینیشن کوریج تے سینمیٹک ایڈیٹنگ دی ویڈیو نے کئی سوالاں نوں جنم دتا اے، کیہ پہاڑاں وچ رہݨ والی دہشتگرد تنظیم ایس قسم دی ویڈیو بݨاوݨ دی صلاحیّت رکھدی اے یا ایہدے پچھے اک منظم حکمتِ عملی کم کر رہی اے؟
جدید طرز تے فلمائی گئی ویڈیو ایہ ثابت کردی اے کہ فتنہ الہندوستان نوں بیرونی فنڈنگ تے تکنیکی سپورٹ حاصل اے۔ اقوامِ متحدہ دی رپورٹ مطابق متعدد دہشتگرد گروہاں دیاں افغانستان وچ سرگرمیاں گواڈھی ملکاں لئی پکا خطرہ نیں، رپورٹ مطابق ویڈیو وچ افغانستان وچ دہشتگرداں نوں مقامی بولی وچ حملیاں دی منصوبہ بندی کردیاں وی صاف دیکھیا جا سکدا اے، سوال ایہ اے کہ پہاڑاں وچ چھپے فتنہ پروراں کول اینی وڈی رقم تے مہنگی ٹیکنالوجی آخر کتھوں آ رہی اے؟
