مردار ککڑیاں ویچݨ دا کیس: عدالت نے ملزم دی ضمانت مسترد کر دتی۔
لاہور: لاہور ہائیکورٹ نے باراں سو کلو مردار ککڑیاں ویچݨ دے کیس وچ ملزم دی درخواستِ ضمانت ناقابلِ سماعت قرار دیندیاں مسترد کر دتی، جسٹس غلام سرور نہنگ نے ریمارکس دتے کہ ایہ اک مافیا اے جو لوکاں دیاں زندگیاں نال کھیڈ رہا اے، پولیس ایہجے ظالم لوکاں نوں تحفظ دندی اے تے ایہجے کیسان وچ ویلے سر تفتیش نہیں کردی جیہدا فائدہ ملزم چکدے نیں۔
لاہور ہائیکورٹ دے جسٹس غلام سرور نہنگ نے ملزم تنویر مسیح دی درخواستِ ضمانت تے سماعت کیتی، پنجاب فوڈ اتھارٹی ولوں عمران عارف رانجھا عدالت وچ پیش ہوئے تے درخواستِ ضمانت دی مخالفت کیتی۔
سماعت دوران جسٹس غلام سرور نہنگ نے ریمارکس دتے کہ ایہ اک مافیا اے جو لوکاں دیاں زندگیاں نال کھیڈ رہا اے، پولیس ایہجے ظالم لوکاں نوں تحفظ دندی اے تے ایہجے کیسان وچ ویلے سر تفتیش نہیں کردی جیہدا فائدہ ملزم چکدے نیں۔
جسٹس غلام سرور نہنگ نے ریمارکس دتے کہ ایہجے ملزماں نوں ریلیف دے کے معاشرے وچ گھناوݨے جرم لئی نہیں چھڈیا جا سکدا، تفتیشی افسراں دی ذمہ داری اے کہ ایہجے کیسان وچ ترجیحی بنیاداں تے بنا کسے تاخیر تفتیش مکمل کرن۔
ملزم دے وکیل نے موقف اختیار کیتا کہ فوڈ اتھارٹی نے اتھ مہینے پہلے چھاپہ مار کے تنویر مسیح نوں گرفتار کیتا سی، تاہم تھانہ بلوچنی فیصل آباد پولیس نے ہلے تک تفتیش مکمل نہیں کیتی، ملزم ولوں ضمانت تے رہائی دی استدعا کیتی گئی، تاہم عدالت نے درخواست ناقابلِ سماعت قرار دیندیاں مسترد کر دتی۔
