مریم نواز نال اوکاڑہ دے ارکانِ اسمبلی دی ملاقات، ترقیاتی منصوبیاں تے گفتگو۔
لاہور: وزیراعلیٰ پنجاب مریم نواز شریف نال اوکاڑہ نال تعلق رکھݨ والے ارکانِ صوبائی اسمبلی نے ملاقات کیتی، جیہدے وچ صوبے دی سیاسی صورتحال، جاری ترقیاتی منصوبیاں تے حلقیاں نوں درپیش عوامی مسئلیاں تے تفصیلی گفتگو کیتی گئی۔
ملاقات کرن والیاں وچ صوبائی وزیر عاشق حسین شاہ، جاوید علاؤالدین ساجد، چوہدری افتخار حسین چھچھر، نور الامین وٹو، علی عباس، میاں یاور زمان، میاں محمد منیر تے غلام رضا شامل سن۔
ارکانِ صوبائی اسمبلی نے وزیراعلیٰ نوں اپنے حلقیاں وچ درپیش عوامی مسئلیاں توں آگاہ کیتا، جیہدے تے مریم نواز شریف نے مسئلیاں دے حل لئی بھرپور تعاون تے قدماں دی یقین دہانی کروائی۔
ارکانِ اسمبلی نے 41 ضلعیاں تے 2 تحصیلاں وچ مربوط سیف سٹی نیٹ ورک قائم کرن تے وزیراعلیٰ مریم نواز شریف نوں خراجِ تحسین پیش کیتا، انہاں نے اوکاڑہ جی ٹی روڈ توں بائی پاس سڑک دی تعمیر و بحالی تے شہریاں لئی الیکٹرو بس سروس دے آغاز تے وی وزیراعلیٰ دا شکریہ ادا کیتا۔
ارکانِ اسمبلی مطابق اوکاڑہ وچ الیکٹرو بساں جنرل بس سٹینڈ توں اختر آباد، کرمانوالہ، اڈہ کسان تے اوکاڑہ یونیورسٹی تک چل رہیاں نیں، جدکہ طالب علماں، سوانیاں تے وڈیریاں لئی مفت سفری سہولت قابلِ تحسین اے۔
ارکانِ صوبائی اسمبلی نے آکھیا کہ سیف سٹی منصوبے تے پولیس دیاں اثر دار کارروائیاں پاروں پنجاب وچ جرائم دی شرح بتدریج گھٹ ہو رہی اے، وزیراعلیٰ مریم نواز شریف دی قیادت وچ پنجاب چنگے توں بہترین ول ودھ رہا اے۔
ارکانِ اسمبلی نے الیکٹرو بس، اپنی چھت اپنا گھر تے کسان کارڈ ورگے منصوبیاں نوں عوام وچ مقبول قرار دتا۔
ایس موقعے تے وزیراعلیٰ مریم نواز شریف نے ارکانِ اسمبلی نوں عوام نال بھرپور رابطے رکھݨ تے ایہناں دے مسئلیاں دے حل لئی اثر دار کردار ادا کرن دی ہدایت کیتی۔
مریم نواز شریف نے آکھیا کہ پنجاب وچ عوامی منصوبیاں دی تکمیل لئی گھٹ ویلے وچ زیادہ توں زیادہ کم کرنا چاہندے نیں، پہلی واری صوبے دے تمام شہراں تے پنڈاں نوں یکساں طور تے ستھرا پنجاب پروگرام راہیں صاف کیتا جا رہا اے۔
وزیراعلیٰ نے آکھیا کہ پنجاب دے عوام دے معیارِ زندگی وچ بہتری دیاں خبراں سن کے ایہناں نوں دلی اطمینان ہوندا اے، انہاں آکھیا کہ پہلی واری لاہور تے پسماندہ شہراں وچالے فرق ختم کیتا جا رہا اے تے ہر شہر تے ہر پنڈ وچ الیکٹرو بساں چلاوݨ دی کوشش کیتی جا رہی اے۔
