نیویارک وچ پاکستان دا یومِ آزادی، تاریخ وچ پہلی واری منفرد تقریب دا انعقاد۔\
نیویارک: (ویب ڈیسک) پاکستان دا یومِ آزادی نیویارک وچ ایس ورھے تاریخی سٹی ہال وچ منایا گیا، جو پاک امریکا کمیونٹی تعلقات دے حوالے نال اک منفرد تے تاریخی پیش رفت قرار دتا گیا۔
ایہ پہلی واری اے کہ پاکستان دے یومِ آزادی دی تقریب نیویارک سٹی ہال دے اندر منعقد ہوئی۔
تقریب دا اہتمام نیویارک سٹی کونسل دی سپیکر جولی مینین تے کونسل ممبر لنڈا لی نے مشترکہ طور تے کیتا، جدکہ امریکن پاکستانی ایڈووکیسی گروپ (اے پی اے جی) نے وی ایس تاریخی تقریب وچ تعاون کیتا۔
نیویارک وچ پاکستان دے قونصل جنرل عامر احمد آتوزئی نے تقریب دے شرکاء نال خطاب کردیاں اے پی اے جی تے شریک ارکانِ پارلیمنٹ دیاں کوشساں نوں سراہیا تے آکھیا کہ سٹی ہال وچ یومِ آزادی دی تقریب دا انعقاد پاکستان نال ایہناں دی محبت تے دیرینہ وابستگی دا واضح اظہار اے۔
قونصل جنرل نے ایس موقعے نوں پاکستانی امریکی کمیونٹی لئی فخر تے یادگار لمحہ قرار دتا۔
تقریب وچ وڈی تعداد وچ پاکستانی نژاد امریکی شہریاں، منتخب نمائندیاں، ارکانِ پارلیمنٹ تے میڈیا نال وابستہ افراد نے شرکت کیتی۔
نیویارک سٹی کونسل دی سپیکر جولی مینین نے پاکستانی امریکی کمیونٹی دی نیویارک شہر دی ترقی وچ اہم خدمات نوں سراہندیاں آکھیا کہ کمیونٹی نے شہر دی پیش رفت تے ترقی وچ قابلِ قدر کردار ادا کرن دے نال نال پاکستان تے امریکا دونوں نال مضبوط وابستگی وی برقرار رکھی اے۔
تقریب وچ شریک دیگر ارکانِ پارلیمنٹ نے وی پاکستانی امریکی کمیونٹی دی مستقل محنت، استقامت تے لگن نوں خراجِ تحسین پیش کیتا، مقررین نے پاک امریکا تعلقات وچ کمیونٹی دے کردار نوں نمایاں کردیاں ایہنوں دونوں ملکاں وچالے اک اہم پل قرار دتا۔
نیویارک سٹی ہال وچ منعقد ہوݨ والی ایہ تاریخی تقریب پاکستانی امریکی کمیونٹی دی ودھدی ہوئی اہمیت تے نیویارک دے شہری، معاشی تے سماجی شعبیاں وچ ایہدی مثبت خدمات دے اعتراف دی وی عکاس اے۔
