جڑواں شہراں وچ تیز بارش، رین ایمرجنسی نافذ، نالہ لئی وچ پانی دی سطح اچی ہو گئی۔

اسلام آباد: اسلام آباد تے راولپنڈی دے وکھ وکھ علاقیاں وچ تیز بارش دا سلسلہ جاری اے جیہدے پاروں نیویں علاقے پانی وچ ڈُب گئے نیں، نالہ لئی وچ پانی دی سطح پری الرٹ تے اپڑ گئی۔

تیز بارش پاروں کسی وی ہنگامی صورتحال نال نمٹݨ لئی رین ایمرجنسی نافذ کر دتی گئی۔

ضلعی انتظامیہ دے مطابق نالہ لئی وچ کٹاریاں دے تھاں تے پانی دا وہاء 9 فٹ تے گوالمنڈی دے تھاں تے 11 فٹ اے، راولپنڈی دے علاقے شمس آباد وچ سب توں ودھ 116 ملی میٹر بارش ریکارڈ کیتی گئی۔

تیز بارش پاروں مری روڈ سمیت راولپنڈی دے نیویں علاقیاں وچ بارشی پانی جمع ہو گیا جیہدے بعد راولپنڈی واسا دیاں ٹیماں نے ڈی واٹرنگ آپریشن شروع کر دتا۔

دوجے پاسے محکمہ موسمیات نے آزادکشمیر، گلگت بلتستان، پنجاب تے خیبرپختونخوا وچ اج وی بارش دی پیش گوئی کر دتی۔

محکمہ موسمیات دے مطابق مون سون دا چھٹا سپیل 21 اگست تک جاری رہے گا۔