بلوچستان وچ دہشت گردی: ایل پی جی دی گھاٹ تے قیمت وچ وادھے دا خدشہ
اسلام آباد: بلوچستان وچ سکیورٹی دے ماڑے حالات پاروں آن والے دناں وچ ایل پی جی دی گھاٹ پیدا ہون تے قیمتاں وچ وادھے دا خدشہ پیدا ہو گیا۔
اوگرا توں حاصل دستاویزات دے مطابق بلوچستان وچ حالیہ دہشت گردانہ حملے خاص کر ایل پی جی ٹینکرز نوں ساڑن دے واقعیاں نے غیر یقینی صورت حال پیدا کر دتی ہے، جیدے نتیجے وچ ایل پی جی دی گھاٹ دا ساہمنا کرنا پے سکدا ہے تے قیمت وی ودھ سکدی ہے۔
اوگرا دستاویزات دے مطابق بلوچستان خاص کر کوئٹہ نوشکی، دالبندین تفتان روٹ اتے سکیورٹی انتظامات دا دائرہ ودھان دی لوڑ ہے تاں جے ایل پی جی دی آندر جان سرحدی علاقیاں وچ بغیر کسے رکاوٹ دے جاری رہے کیوں جو بھاری مالی نقصان پاروں ایل پی جی دے مرکزی درآمدکنندگان کم جاری رکھن وچ ہچکچاہٹ دا شکار نیں۔
اوگرا نے خبردار کیتا ہے کہ فوری تے موثر قدم نہ چُکے گئے تاں پاکستان وچ ایل پی جی دی فراہمی نیڑے مستقبل وچ بری طرح متاثر ہو سکدی ہے۔
یاد رہے کہ مائع پٹرولیم گیس پاکستان وچ وڈی آبادی لئی کھانا پکاون دے مرکزی ایندھن دے طور اتے ورتی جاندی ہے، صرف 28 توں 30 فیصدی آبادی نوں ہی قدرتی گیس دی سہولت ملدی ہے جدکہ باقی آبادی ایندھن دے متبادل ذرائع ورتن اتے مجبور ہے۔
پاکستان دی ایل پی جی مارکیٹ دا انحصار درآمد اتے ہے، سالانہ مقامی منگ لگ بھگ 2 ملین ٹن ہے جیدے وچوں 70 فیصدی گیس درآمد کیتی جاندی ہے جدکہ مقامی پیداوار ملکی لوڑاں دا 30 فیصدی فراہم کردی ہے۔
پاکستان وچ 75 فیصدی ایل پی جی بلوچستان وچ پاک ایران سرحدی رستے دے ذریعے درآمد ہوندی ہے تے اس رستے اتے رکاوٹاں نال سِدھا قومی پدھر اتے دستیابی متاثر ہوندی ہے، خرچہ ودھ جاندا ہے تے قیمت وچ وی وادھا ہوندا ہے۔
اوگرا نے ایل پی جی دی بلاتعطل فراہمی لئی سارے متعلقہ اداریاں دے وچکار آپسی ساجھ داری یقینی بنان اتے زور دیندیاں سٹریٹجک سپلائی روٹ اتے حملے کرن والیاں دے خلاف موثر قدم چکن دا مطالبہ کیتا تاں جے مارکیٹ مستحکم رہ سکے۔
خیال رہے کہ ایل پی جی دی قیمت وچ پہلاں ہی اس مہینے ریکارڈ وادھا ہو چکیا ہے، سرکاری پدھر اتے نرخ 12.89 روپے فی کلوگرام ودھن مگروں 254.32 روپے فی کلو ہو چکے نیں جدکہ کئی تھانواں اتے ورتکن والے اس توں وی زیادہ قیمت اتے ایل پی جی خریدن اتے مجبور نیں۔
اس توں پہلاں کسٹمز حکام نے سینٹ دی سٹینڈنگ کمیٹی نوں دسویا سی کہ 30 توں 40 پٹرولیم و ایل پی جی ٹینکرز اتے بلوچستان وچ حملے ہوئے نیں جید نال تقریبن دو ارب روپے دا نقصان ہویا۔
کسٹمز حکام نے ایہہ وی دسویا کہ ہن پٹرولیم شیواں دی آندر جان سکیورٹی قافلیاں دی نگرانی وچ ہوندی ہے جید نال صورت حال بہتر ہوئی ہے پر سکیورٹی انتظامات دے باجود حملے جاری نیں جید لئی موثر تے پکا حفاظتی حل چاہیدا ہے۔
