خیبرپختونخوا کے پہاڑی علاقیاں وچ 19 توں 22 اگست تک لینڈ سلائیڈنگ دا الرٹ جاری

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر (این ای او سی) نے خیبر پختونخوا دے حساس پہاڑی علاقیاں وچ 19 توں 22 اگست دے دوران لینڈ سلائیڈنگ دے خطرے دے پیش نظر الرٹ جاری کر دتا۔
این ڈی ایم اے دے مطابق ملاکنڈ، لوئر دیر، اپر دیر، شانگلہ، سوات، بٹگرام، آلائی، اپر و لوئر چترال، اپر و لوئر کوہستان، کولائی پالس، مانسہرہ تے گلیات دے پہاڑی علاقے لینڈ سلائیڈنگ دے حوالے نال حساس قرار دتے گئے نیں۔
الرٹ وچ آکھیا گیا اے کہ لینڈ سلائیڈنگ، پتھر گرن تے ملبے دے وہاء پاروں حساس پہاڑی سڑکاں اتے ٹریفک دی روانی عارضی یا لمے چر لئی متاثر ہون جدکہ کجھ تھانواں اتے سڑکاں بند ہون دا خدشہ اے۔
این ڈی ایم اے نے این-45 بٹ خیلہ، چکدرہ، دیر، متکنی روڈ، این-45، ایس-4 اے تے ایس-16 دیر ویلیز، این-90، این-95 چکدرہ، مینگورہ، مدین، بحرین تے کالام سمیت آلائی، پوکل تے گنگوال روڈز نوں خاص طور اتے حساس قرار دتا اے۔
ایس طرحاں این-140 تے چترال، بونی، مستوج کوریڈور، این-45 دروش، لواری، چترال تے چترال، گرم چشمہ روڈ اتے وی لینڈ سلائیڈنگ دا خدشہ ظاہر کیتا گیا اے۔
قراقرم ہائی وے اتے داسو، کومیلہ تے سیو، پٹن، دوبیر تے جیجل جدکہ پالس تے کولائی تک اپڑن والیاں سڑکاں نوں وی حساس قرار دتا گیا اے، این-15 بالاکوٹ، کاغان تے ناران جدکہ ایبٹ آباد، گلیات تے تھنڈیانی روڈز اتے وی لینڈ سلائیڈنگ دے خطرے دی نشاندہی کیتی گئی اے۔
این ڈی ایم اے نے خبردار کیتا اے کہ لینڈ سلائیڈنگ تے پتھر گرن دے واقعیاں نال سڑکاں، پُلاں، بچاؤ والاں تے دوجے بنیادی ڈھانچے نوں نقصان پہنچن، ٹریفک وچ خلل پین تے دُور دراز علاقیاں دا زمینی رابطہ کٹ جان دا خدشہ اے، اچانک پہاڑی تودے گرن تے ملبے دے وہاء نال مسافراں، ڈرائیوراں تے مقامی آبادی، خاص کر پہاڑی ڈھلواناں دے نیڑے وسدے لوکاں نوں سِدھا خطرہ ہو سکدا اے۔
این ای او سی نے متعلقہ ضلعی انتظامیہ تے اداریاں نوں حساس پہاڑی ڈھلواناں دی لگاتار نگرانی، ہنگامی ٹیماں دی تیاری تے کسے وی ممکنہ لینڈ سلائیڈنگ دی صورت وچ فوری کارروائی یقینی بنان دی ہدایت کیتی اے، حساس سڑکاں اتے رکاوٹاں نال نبٹن لئی ضروری مشینری، ریسکیو وسلیئتے متبادل انتظامات وی پہلاں توں یقینی بنان دی ہدایت کیتی گئی اے۔
این ڈی ایم اے نے عوام تے مسافراں نوں لینڈ سلائیڈنگ دے خطرے توں دوچار پہاڑی علاقیاں تے سڑکاں اتے غیر ضروری سفر توں بچن دا مشورہ دتا اے، شہری سفر توں پہلاں موسم تے سڑکاں دی تازہ ترین صورت حال توں جانکاری حاصل کرن تے متعلقہ اداریاں ولوں بند کیتی گئی سڑکاں اتے سفر توں مکمل پرهیز کرن۔
اس توں علاوہ پہاڑی علاقیاں وچ سفر دے دوران لینڈ سلائیڈنگ، پتھر گرن یا ملبے دے وہاء دی صورت وچ متاثرہ تھاں توں محفوظ فاصلہ رکھن تے انتظامیہ تے ریسکیو اداریاں دیاں ہدایات اتے عمل کرن دی وی ہدایت کیتی گئی اے۔
دوجے پاسے حکام دا کہنا سی کہ عوام موسم تے ممکنہ قدرتی آفات توں متعلق ویلے سر جانکاری لئی این ڈی ایم اے دی آفیشل ایپ ’پاک این ڈی ایم اے ڈیزاسٹر الرٹ‘ توں فائدہ چُک سکدے نیں۔