عمران خان نوں شفا ہسپتال منتقل کرن دا حکم، ذاتی معالج ڈاکٹر فیصل تے بھین ڈاکٹر عظمیٰ نوں وی میڈیکل بورڈ نال جڑے رہن دی اجازت، صحت تے سیاست کیتی گئی تاں سہولت واپس لئی جا سکدی اے: سپریم کورٹ

عمران خان دی نبض نارمل نہیں تے نہ ای دل، میڈیکل رپورٹ ذہنی پریشانی (اضطراب) دا شکار قرار دے رہی اے، ٹبر نال ہر ہفتے ملاقات تے ہفتے وچ دو دن پتراں نال گل کروائی جاوے، مقدماں دی تفصیل پیش کیتی جاوے: عدالت। قانون دی خلاف ورزی تے ملاقات نہیں ہووے گی: ایڈووکیٹ جنرل۔ جے اوہ خلاف ورزی کر رہے نیں تاں کی تسیں وی کرو گے؟ ملاقات احسان نہیں، بنیادی حق اے: تحریری حکم نامہ جاری، سماعت 16 ستمبر تیکر ملتوی۔

اسلام آباد (کورٹ رپورٹر، اے پی پی، مانیٹرنگ ڈیسک) سپریم کورٹ نے بانی پی ٹی آئی عمران خان نوں 2 دناں وچ شفا انٹرنیشنل ہسپتال اسلام آباد منتقل کرن تے مکمل طبی معائنہ کروان دا حکم دے دتا۔ عدالت نے ایہ وی حکم دتا کہ عمران خان نال انہاں دے ٹبر دی ہر ہفتے ملاقات کروائی جاوے تے ہفتے وچ 2 دن پتراں نال گل وی کروائی جاوے۔ سپریم کورٹ نے عمران خان دے چیک اپ لئی میڈیکل بورڈ بنان دی ہدایت کیتی تے بانی دے ذاتی معالج ڈاکٹر فیصل سلطان تے انہاں دی بھین ڈاکٹر عظمیٰ خان نوں وی انہاں دے طبی معائنے تے علاج دے عمل نال جڑے رہن دی اجازت دے دتی۔ عدالت نے خبردار وی کیتا کہ صحت تے سیاست کیتی گئی تاں سہولت واپس لئی جا سکدی اے۔

جسٹس شاہد وحید، جسٹس نعیم اختر افغان تے جسٹس اشتیاق ابراہیم تے مشتمل تن رکنی بینچ نے کیس دی سماعت کیتی۔ درخواست گزار دے وکیل عزیر بھنڈاری نے مؤقف اختیار کیتا کہ جیل حکام انہاں نوں بانی دی میڈیکل، طبی معائنے تے ٹیسٹاں دی رپورٹس تے علاج دی تفصیلات نہیں دے رہے۔ حکومتی مؤقف سی کہ سینٹرل جیل راولپنڈی دے سپرنٹنڈنٹ نے طبی علاج تے چیک اپ نال متعلق تفصیلات عدالت وچ جمع کروائیاں نیں۔

تاہم سپریم کورٹ نے حکومتی مؤقف نال اتفاق نہیں کیتا۔ ست صفحیاں تے مشتمل تحریری فیصلے وچ قرار دتا گیا کہ پیش کیتی گئی دستاویز محض عمران خان دیاں بیماریاں تے علاج دی سمری اے، مکمل طبی ریکارڈ نہیں۔ عدالت نے پچھیا کہ کی کوئی قانونی رکاوٹ موجود اے جو حکومت نوں بانی تے انہاں دے گھر والیاں نوں میڈیکل ٹیسٹ رپورٹس، نسخے، معائنے دیاں رپورٹس، علاج دی تفصیلات تے متعلقہ ڈاکٹراں دی آرا دین توں روکدی ہووے؟ ایڈووکیٹ جنرل نے صاف طور تے منیا کہ ایہوجہی کوئی قانونی پابندی نہیں۔ عدالت نے حکومت نوں ہدایت کیتی کہ عمران خان دا گرفتاری توں ہن تیکر دا مکمل طبی ریکارڈ پیش کیتا جاوے، تمام ریکارڈ اگلی سماعت توں پہلے جمع کروایا جاوے۔ عدالت نے قرار دتا کہ بانی پی ٹی آئی دی طبی حالت دی پیش کیتی گئی سمری بادی النظر وچ انہاں دی صحت وچ خرابی ول اشارہ کردی اے۔

درخواست گزار دے وکیل نے عدالت نوں بتایا سی کہ جیل سپرنٹنڈنٹ دی رپورٹ دے مطابق بانی نوں زیادہ باقاعدگی نال ٹبر نال ملاقات تے پڑھن دے مواد تیکر رسائی دی لوڑ اے۔ سپریم کورٹ نے حکومت تے افسراں نوں شفا انٹرنیشنل ہسپتال انتظامیہ نال مشاورت تے رابطے راہیں میڈیکل بورڈ بنان دی ہدایت کیتی۔ تحریری حکم دے مطابق میڈیکل بورڈ وچ جنرل سرجن، جنرل فزیشن، آئی سپیشلسٹ، کارڈیالوجسٹ تے میڈیسن سپیشلسٹ نوں شامل کیتا جاوے۔ ہسپتال وچ علاج تے ملن والیاں طبی سہولتاں دے ضروری خرچے بانی یا انہاں دا ٹبر برداش کرے گا۔ عدالت نے صاف کیتا کہ عمران خان یا انہاں نال کسے وی حیثیت وچ جڑیا بندہ انہاں دیاں طبی رپورٹس یا صحت نال متعلق معلومات نوں سیاسی فائدے لئی استعمال نہیں کرے گا۔ شفا انٹرنیشنل ہسپتال دی حدود وچ کوئی عوامی کٹھ (اجتماع) نہ ہووے۔

عدالت نے حکومت نوں ہدایت کیتی کہ عمران خان دے ہسپتال وچ رہن دوران مناسب سکیورٹی پربندھ کیتے جاون۔ سپریم کورٹ نے عمران خان تے انہاں دے ٹبر وچکار ہفتے وچ اک وار ملاقات کروان دی سہولت دین تے بانی نوں پتراں نال ہفتے وچ دو وار ٹیلی فون تے گل کرن دی سہولت دین دی ہدایت کیتی۔ جسٹس شاہد وحید نے پچھیا کہ بھیناں دی ملاقات تے حکومت دا کی مؤقف اے؟ ایڈووکیٹ جنرل اسلام آباد نے مؤقف اختیار کیتا کہ جے کوئی قانون دی خلاف ورزی کرے گا تاں ملاقات نہیں ہووے گی۔ جسٹس شاہد وحید نے سوال کیتا کہ جے کوئی قانون دی خلاف ورزی کر رہا اے تاں کی تسیں وی کرو گے؟ جسٹس شاہد وحید نے ریمارکس دتے کہ بھیناں نال ملاقات کوئی احسان نہیں سگوں انہاں دا بنیادی حق اے، ریاست دا کم نہیں کہ اوہ قانون دی خلاف ورزی کرے۔ ایڈووکیٹ جنرل اسلام آباد نے عدالت نوں بتایا کہ پچھلے تن سالاں وچ بانی دی بھیناں نال 48 ملاقاتاں کروائیاں گئیاں نیں۔

سپریم کورٹ نے بانی دی تن سالاں وچ ٹبر تے وکلا نال تمام ملاقاتاں دی تفصیلات منگ لئیاں، عدالت نے بچیاں نال فون تے گل کروان دا ریکارڈ وی منگ لیا۔ وکیل عزیر بھنڈاری نے ڈاکٹر عظمیٰ خان تے ڈاکٹر عاصم یوسف نوں بانی نال ملاقات دی اجازت دین دی استدعا کیتی۔ جسٹس شاہد وحید نے پچھیا کہ کی گارنٹی اے کہ باہر آ کے میڈیا ٹاک نہیں ہووے گی؟ وکیل نے جواب دتا کہ اوہ ڈاکٹر عظمیٰ دے وکیل نیں تے انہاں دی ہدایات تے یقین دہانی کروا رہے نیں۔ دوبارہ سماعت شروع ہون تے جسٹس شاہد وحید نے پچھیا کہ بانی دی کس بھین دی ملاقات ہونی چاہی دی اے؟ عزیر بھنڈاری نے جواب دتا کہ ڈاکٹر عظمیٰ خان چونکہ ڈاکٹر نیں، ایس لئی انہاں دی ملاقات کروائی جاوے۔ ایڈیشنل اٹارنی جنرل نے مؤقف اختیار کیتا کہ ڈاکٹر عظمیٰ دی درخواست تے حکومت نوں نوٹس جاری نہیں ہویا۔ جسٹس نعیم اختر افغان نے کہا کہ حکومت دا مؤقف وی دیکھ لیا جاوے گا، ایڈووکیٹ جنرل نے کہا کہ اوہ ڈاکٹر عظمیٰ والے کیس وچ پیش نہیں ہوئے۔ جسٹس نعیم اختر افغان نے پچھیا، تسیں ایہ گل سویرے کیوں نہیں کیتی؟ جسٹس شاہد وحید نے ایڈووکیٹ جنرل نوں مخاطب کردیاں ریمارکس دتے، تسیں اسلام آباد دے سینئر ترین لا افسر ہو، ایہنج نہ کرو۔

جسٹس شاہد وحید نے عمران خان خلاف مقدماں تے سزاواں بارے وی پچھیا تے سوال کیتا کہ عمران خان کتنے مقدماں وچ سزا یافتہ نیں؟ عدالت نے حکومت نوں ہدایت کیتی کہ بانی خلاف انہاں سارے مقدماں دی تفصیلات پیش کیتیاں جاون جنہاں وچ اوہ ملزم، گرفتار، زیرِ سماعت مقدماں وچ فریق یا سزا یافتہ نیں۔ عدالت نے میڈیکل رپورٹس دا حوالہ دیندیاں ایہ وی ریمارکس دتے کہ رپورٹ بانی نوں ذہنی پریشانی دا شکار قرار دے رہی اے، ایڈیشنل اٹارنی جنرل نے بانی دی طبی درخواست دے قابلِ سماعت ہون تے وی اعتراض چُکیا۔ عدالت نے قرار دتا کہ درخواست دے قابلِ سماعت ہون تے دوجے حکومتی اعتراضاں دا فیصلہ اگلی سماعت تے کیتا جاوے گا۔

عدالت نے قرار دتا کہ ایہ سارے پربندھ فریقین دے حقاں تے مؤقف نوں متاثر کیتے بغیر عبوری بنیاداں تے کیتے جا رہے نیں۔ جسٹس شاہد وحید نے بانی دا تمام میڈیکل ریکارڈ اگلی سماعت توں پہلے جمع کروان دی ہدایت کردیاں ریمارکس دتے کہ ریکارڈ عدالت وچ آوے گا تاں لُکیا نہیں رہے گا۔ دورانِ سماعت جسٹس نعیم اختر افغان نے کہا، تواڈی رپورٹ وچ لکھیا اے کہ انجیوگرافی کروانی اے، کی جیل وچ انجیوگرافی ہو سکدی اے؟ جس تے ایڈووکیٹ جنرل اسلام آباد نے جواب دتا کہ باہر ہسپتال توں ہو سکدی اے۔ جسٹس شاہد وحید نے کہا کہ بانی دی نہ نبض نارمل اے، نہ ای دل، میڈیکل رپورٹس دے مطابق انہاں دے وائیٹل آرگنز متاثر ہونا شروع ہو گئے نیں۔ جسٹس نعیم اختر نے ریمارکس دتے کہ پی ٹی آئی نوں بانی دی صحت تے سیاست نہیں کرنی چاہی دی، انہاں نوں اک گل طے کر لینی چاہی دی اے کہ بانی دی طبی حالت تے کوئی سیاست نہیں ہووے گی۔ بعد وچ عدالت نے سماعت 16 ستمبر تیکر ملتوی کر دتی۔

اسلام آباد (مانیٹرنگ ڈیسک) حکومت نے بانی پی ٹی آئی دا علاج نجی ہسپتال توں کروان دے حکم تے سپریم کورٹ وچ نظرِ ثانی درخواست دائر کرن دا فیصلہ کر لیا۔ وفاقی وزیرِ قانون اعظم نذیر تارڑ نے کہا اے کہ سزا یافتہ قیدیاں دا علاج سرکاری ہسپتالاں وچ ہوندا اے، بانی دی ہسپتال منتقلی نال متعلق حکم دا جائزہ لیا گیا اے، عدالتی حکم دے کچھ نکتاں دا تعلق جیل اتھارٹی تے اسلام آباد انتظامیہ نال اے۔ اتھارٹیز دی تجویز اے کہ نظرِ ثانی راہیں ایس حکم دی مناسب موڈیفکیشن دی درخواست کیتی جاوے تاکہ بانی دا کسے سرکاری ہسپتال توں طبی معائنہ کروایا جاوے، بورڈ ایہ فیصلہ کرے گا کہ جیل وچ علاج ہووے گا یا باہر ہسپتال لے جایا جاوے گا، بورڈ علاج لئی جیل توں باہر منتقل کرے تاں سرکاری ہسپتال لے جایا جاوے گا۔ انہاں نے کہا کہ آیا ایہ حکم تمام جیلاں دے قیدیاں لئی ہووے گا یا نہیں؟ لیگل ٹیم نے مشاورت کیتی اے تے ابہام نوں دور کرن لئی عدالت نال رجوع کیتا جا رہا اے۔