ڈونلڈ ٹرمپ دا نواں نقشہ: آبنائے ہرمز نوں امریکی علاقہ قرار دے دتا، تیل دیاں قیمتاں وددھ گئیاں نہ کوئی گل بات ہو رہی اے تے نہ ای ہونی اے ; امریکی صدر
ٹرمپ دی غلط فہمی جلد دور ہو جاوے گی، شرطاں پوریاں ہون تیکر ہرمز دا راہ بند رہے گا: ایران। اردوان دا امریکی صدر نوں فون، گل بات تے زور، امن عمل وچ تعاون دی پیشکش। حوثیاں دا سعودی آئل تنصیبات تے حملے دا دعویٰ، امارات دا تہران ولوں میزائل داغے جان دا الزام، ایران نال تجارتی، کاروباری تے مالی معاملے معطل کر دتے۔
تہران، واشنگٹن (نیوز ایجنسیاں، مانیٹرنگ ڈیسک) امریکی صدر ڈونلڈ ٹرمپ نے منگل دے دن نویں نقشے وچ آبنائے ہرمز نوں امریکی علاقہ قرار دے دتا تے کہا کہ امریکہ تے ایران وچکار نہ تاں کوئی گل بات ہو رہی اے تے نہ ای ہونی اے، تاہم آبنائے ہرمز کھلی اے، جبکہ ایران نے کہا اے کہ امریکہ ولوں مفاہمتی یادداشت دیاں شرطاں پوریاں کیتے جان تیکر ایہ بحری راہ بند رہے گا۔ امریکہ تے ایران وچکار آبنائے ہرمز دوبارہ کھولن لئی معاہدے دے امکانات گھٹن پاروں تیل دیاں قیمتاں پھر اوپر چلی گئیاں۔ ٹرمپ نے ‘ٹروتھ سوشل’ تے اک پوسٹ وچ کہا کہ اسلامی جمہوریہ ایران نال کوئی گل بات نہیں ہو رہی تے نہ ای کوئی بات چیت طے اے۔ ایران خلاف بحری ناکہ بندی پوری طرحں نافذ العمل تے برقرار اے۔ آبنائے ہرمز کھلی اے تے ایس وچ آؤن جاوݨ جاری اے۔ پانی وچ بچھائیاں گئیاں تمام بارودی سرنگاں ہٹا دتیاں گئیاں نیں یا انہاں نوں دھماکے نال اڈا دتا گیا اے۔ ٹرمپ نے اپنی پوسٹ وچ آبنائے ہرمز، ایران دے کچھ حصے، خلیج فارس تے خلیج عمان دا نقشہ شیئر کیتا، جس وچ آبنائے ہرمز دوالے نمایاں کیتے گئے علاقے تے “نیو یو ایس ٹیریٹری” یعنی امریکہ دا نواں علاقہ درج سی۔
ترکیہ دے صدر رجب طیب اردوان نے امریکی صدر ڈونلڈ ٹرمپ نال ٹیلی فون تے گفتگو کردیاں زور دتا کہ ایران تے امریکہ وچکار کشیدگی گھٹ کرن لئی مذاکرات دا راہ اختیار کیتا جاوے۔ صدر اردوان نے امن دیاں کوششاں وچ انقرہ دے تعاون دی پیشکش وی کیتی۔ ایوانِ صدر دے مطابق اردوان تے ٹرمپ وچکار دوطرفہ تعلقات، غزہ دی جنگ، ترکیہ، سعودی عرب تے پاکستان وچکار طے پاؤن والے دفاعی معاہدے تے وی گفتگو ہوئی۔ ترک صدر نے ایس معاہدے نوں علاقائی استحکام تے سلامتی لئی ‘مضبوط مؤقف’ دی علامت قرار دتا۔ ترک ایوانِ صدر دے مطابق اردوان نے ٹرمپ نوں بتایا کہ فلسطینیاں خلاف اسرائیلی حملیاں وچ ایس ویلے وادھا ہویا جدوں ٹرمپ دے غزہ امن منصوبے دے دوجے مرحلے تے عمل درآمد شروع ہونا سی۔
ایرانی حکومت دے اعلیٰ مذاکرات کار باقر قالیباف نے اپنے بیان وچ کہا کہ آبنائے ہرمز ایس ویلے تیکر بند رہے گی جدوں تیکر امریکہ جون وچ ایران نال طے پاؤن والے عبوری معاہدے دیاں شرطاں پوریاں نہیں کردا۔ قالیباف نے پارلیمان نوں بتایا کہ انہاں شرطاں وچ امریکہ ولوں ایرانی بندرگاہواں دی ناکہ بندی ختم کرنا، تیل تے لائیائیاں پابندیاں ہٹاؤنا، تہران دے منجمد اثاثے جاری کرنا، تے تمام محاذائیاں تے دھمکیاں تے فوجی کارروائیاں ختم کرنا شامل نیں۔
ایران دے نائب وزیرِ خارجہ کاظم غریب آبادی نے ٹرمپ ولوں آبنائے ہرمز نوں اپنا علاقہ ظاہر کرن تے اپنے ردِعمل وچ کہا کہ آبنائے ہرمز بارے ٹرمپ دی غلط فہمی جلد دور ہو جاوے گی یا پھر اسیں ایس گمراہ کن سوچ رکھن والے بندے دی غلط فہمی دور کر دیاں گے۔ قطر دی وزارتِ خارجہ دے ترجمان ماجد الانصاری نے اک پریس کانفرنس دوران کہا اے کہ آبنائے ہرمز نال متعلق ایران عمان معاہدے توں بعد ای واشنگٹن تے تہران نوں جنگ دے خاتمے لئی مذاکرات دوبارہ شروع کرن تے آمادہ کرن دی کوشش کیتی جاوے گی۔
ایہدے علاوہ یمن وچ حوثی گروہ انصار اللہ نے اک وار پھر سعودی عرب دے علاقے جازان وچ آرامکو دی تیل تنصیبات تے ڈرون حملے کرن دا دعویٰ کیتا اے۔ رپورٹ دے مطابق حوثیاں نے یمن دے صوبیاں صعدہ تے حجہ دی فضائی حدود دی مبینہ خلاف ورزی دے ردِعمل وچ جازان وچ واقع آرامکو دی تنصیبات نوں متعدد ڈرونز راہیں نشانہ بنایا۔ جبکہ متحدہ عرب امارات نے ایران تے اپنی حدود ول 2 بیلسٹک میزائل داغن دا الزام عائد کیتا اے۔ بعد وچ متحدہ عرب امارات نے ایران نال تمام تجارتی، کاروباری تے مالی معاملے تاحکمِ ثانی معطل کر دتے۔
ادھر عالمی سطح تے تیل دیاں قیمتاں وچ وادھا جبکہ ایشیائی سٹاک مارکیٹس وچ عمومی مندی رہی۔ عالمی بینچ مارک برینٹ خام تیل 91 ڈالر فی بیرل توں لنگھ گیا، ویسٹ ٹیکساس انٹرمیڈیٹ 1.2 فیصد ودھ کے 85.54 ڈالر فی بیرل ہو گیا۔
