وزیراعظم دی زیرِ صدارت توانائی کمیٹی دا اجلاس: صنعتی تے گھریلو صارفین نوں مناسب قیمتاں تے بجلی دی فراہمی دی حکمتِ عملی منظور

ہائی لیول ڈیزائن، نیشنل الیکٹریسٹی پلان وچ ترامیم منظور، کے پی حکومت تے نیشنل الیکٹرک پاور اتھارٹی نال مشاورت دی ہدایت। نوجواناں نوں باعزت روزگار دی فراہمی ترجیح، حج پربندھ (انتظامات) ویلے سر مکمل کیتے جاون: شہباز شریف، گوگل دے آفس دا افتتاح وی کیتا۔

اسلام آباد (نامہ نگار، اے پی پی، دنیا نیوز) وزیراعظم محمد شہباز شریف دی زیرِ صدارت کابینہ کمیٹی برائے توانائی دے اجلاس وچ پاور ڈویژن ولوں پیش کیتے گئے مربوط توانائی پلان دے ہائی لیول ڈیزائن تے نیشنل الیکٹریسٹی پلان وچ ترامیم دی منظوری دے دتی گئی۔ پلان تحت صنعتی تے گھریلو صارفین نوں مناسب قیمت تے بجلی دی فراہمی لئی حکمتِ عملی ترتیب دتی جاوے گی۔ کمیٹی نے ہدایت کیتی کہ ترامیم تے خیبرپختونخوا حکومت تے نیشنل الیکٹرک پاور ریگولیٹری اتھارٹی (نیپرا) نال مزید مشاورت کیتی جاوے۔

وزیراعظم ہاؤس وچ ہون والے اجلاس وچ پاور ڈویژن نے نیشنل الیکٹریسٹی پلان وچ ترامیم پیش کیتیاں، جنہاں نوں کمیٹی نے منظور کر لیا۔ مربوط توانائی پلان دے ہائی لیول ڈیزائن دی وی منظوری دتی گئی۔

ایس دوران قومی یوتھ ایمپلائمنٹ پالیسی تے پیش رفت دے جائزہ اجلاس دی صدارت کردیاں وزیراعظم نے کہا کہ حکومت دی پہلی نیشنل یوتھ ایمپلائمنٹ پالیسی دا اجرا نوجواناں نوں روزگار دی فراہمی دے عزم دا عکاس اے، ہنرمند تے باصلاحیت نوجواناں نوں باعزت روزگار دی فراہمی حکومت دی پہلی ترجیحاں وچ شامل اے۔ نوجواناں، خصوصاً سوانیاں (خواتین) دی روزگار دے نویں موقعیاں تیکر رسائی یقینی بنان لئی انہاں نوں ہنرمند بنان تے خاص توجہ دتی جاوے۔

وزیراعظم نال وفاقی وزیرِ مذہبی امور سردار محمد یوسف نے ملاقات کیتی تے آؤن والے حج دیاں تیاریاں تے پربندھاں توں آگاہ کیتا۔ وزیراعظم نے پاکستانی عازمین نوں بہترین سہولتاں دی فراہمی تے مؤثر پربندھ یقینی بنان دی ہدایت کردیاں کہا کہ حج دے سارے ضروری قدم ویلے سر مکمل کیتے جاون۔

وزیراعظم نے پاکستان وچ گوگل دے مقامی آفس دے قیام دا خیرمقدم کردیاں کہا اے کہ پاکستان ڈیجیٹل ٹرانسفارمیشن دے عمل توں لنگھ رہا اے، نوجواناں نوں جدید ٹیکنالوجی نال لیس کر کے ملکی تقدیر بدل سکدے ہاں۔ گوگل دے مقامی آفس دی افتتاحی تقریب وچ گوگل دی ٹیم دا خیرمقدم کردیاں وزیراعظم نے کہا کہ ایہ اک لمے سفر دا آغاز اے۔ گوگل دے نائب صدر ولسن ایل وائٹ نے ملاقات تے وزیراعظم دا شکریہ ادا کردیاں کہا کہ پاکستان آؤنا تے اتھے کام کرنا گوگل لئی اعزاز دی گل اے۔