13 تے 14 مارچ 2027 نوں لاہور وچ بسنت، نوجوان اکٹھے ہون، یاداں بنان: مریم نواز
اوورسیز پاکستانیاں نوں وی شرکت دی دعوت، “میں تواڈا انتظار کراں گی، بسنت نوں یادگار بناواں گے”، گھٹ ویلے وچ زیادہ کم کرنا چاہندے ہاں، صاف پانی ہر بندے دا بنیادی حق: ارکانِ اسمبلی نال گفتگو
لاہور (اپنے سٹی رپورٹر توں، سٹاف رپورٹر) وزیراعلیٰ پنجاب مریم نواز نے 13 تے 14 مارچ 2027 نوں بسنت مناون دا اعلان کر دتا تے کہا کہ مارچ وچ لاہور اک وار پھر رنگاں، ثقافت تے تہوار دا مرکز بنے گا، بسنت تے موسیقی، ثقافتی سرگرمیاں تے جشن دا پربندھ ہووے گا۔
اپنے بیان وچ انہاں نے کہا کہ پنجاب تے پاکستان دے نوجواناں نوں بسنت وچ شرکت دی دعوت دینی ہاں، نوجوان اکٹھے ہون، یاداں بنان تے اپنی توانائی نال لاہور نوں روشن کرن۔ انہاں نے اوورسیز پاکستانیاں نوں وی لاہور آؤن تے بسنت وچ شرکت دی دعوت دتی تے کہا کہ اوورسیز پاکستانی تے عالمی مہمان 12، 13 تے 14 مارچ دیاں تاریخاں سانبھ لین، تواڈا انتظار کراں گی، لاہور انتظار کرے گا، پاکستان تواڈا انتظار کرے گا، انشاء اللہ مل کے بسنت نوں یادگار بناواں گے۔
ایس دوران وزیراعلیٰ پنجاب نال اوکاڑہ دے ارکانِ صوبائی اسمبلی، صوبائی وزیر عاشق حسین شاہ، جاوید علاؤالدین، افتخار حسین چھچھر، نور الامین وٹو، علی عباس، میاں یاور زمان، میاں منیر تے غلام رضا نے ملاقات کیتی۔ سیاسی صورتحال، ترقیاتی کماں تے حلقے دے مسئلاں تے تفصیلی گفتگو کیتی گئی۔
ارکانِ اسمبلی نے عوامی مسئلاں توں آگاہ کیتا، وزیراعلیٰ نے مسئلاں دے حل دی بھرپور یقین دہانی کروائی۔ وزیراعلیٰ نے ارکانِ اسمبلی نوں عوام نال بھرپور رابطیاں دی ہدایت کیتی تے کہا کہ پنجاب وچ ترقیاتی کماں لئی گھٹ ویلے وچ زیادہ توں زیادہ کم کرنا چاہندے ہاں، پہلی وار صوبے دے سارے شہراں تے پنڈاں نوں یکساں طور تے ‘ستھرا پنجاب’ راہیں صاف کیتا جا رہا اے، لاہور تے پسماندہ شہراں دا فرق ختم کیتا، ہر شہر تے ہر پنڈ وچ الیکٹرک بس چلا رہے ہاں۔
ایہدے توں علاوہ وزیراعلیٰ مریم نواز دی زیرِ صدارت صاف پانی نال متعلق مسلسل چھٹا اجلاس ہویا۔ واٹر فلٹریشن پلانٹ پراجیکٹس تے بریفنگ دتی گئی۔ وزیراعلیٰ نے ہر ضلعے وچ پراجیکٹس تے پیش رفت دا تفصیلی جائزہ لیا، واٹر فلٹریشن پلانٹاں دی ویلے سر تکمیل تے 736 غیر فعال واٹر فلٹریشن پلانٹاں دی بحالی دے اقدامات دا حکم دتا تے کہا کہ عوام دی سہولت لئی واٹر فلٹریشن پلانٹ پراجیکٹ دی تکمیل بہت ضروری اے۔ صاف پانی دی دستیابی ہر بندے دا بنیادی حق اے۔
