انصاف مل گیا: آفریدی، ہسپتال دے باہر کارکن نہ آون: گوہر

بشریٰ بی بی نوں وی صحت دیاں سہولتاں دیو: گوہر، وعدے دا پاس رکھو: سلمان اکرم

اسلام آباد چیئرمین پی ٹی آئی بیرسٹر گوہر علی خان نے سپریم کورٹ دے فیصلے دا خیرمقدم کردیاں کہا اے کہ بانی پی ٹی آئی عمران خان نوں فوری ہسپتال منتقل کیتا جاوے، سپریم کورٹ دے حکم تے اسیں مکمل عمل کراں گے۔ پارلیمنٹ ہاؤس وچ میڈیا نال گفتگو کردیاں انہاں کہا کہ شفا انٹرنیشنل ہسپتال دے باہر کارکن اکٹھے نہ ہون تاکہ علاج وچ کوئی رکاوٹ نہ آوے۔ مزید کہا کہ بانی پی ٹی آئی دی صحت نال متعلق رپورٹس نوں ذاتی معاملیاں لئی استعمال نہیں کیتا جاوے گا، بشریٰ بی بی نوں وی طبی سہولتاں فراہم کیتیاں جاون۔

پی ٹی آئی دے سیکرٹری جنرل سلمان اکرم راجہ نے کہا کہ کسی صورت عمران خان دی صحت تے سیاست نہیں کراں گے۔ میں بطور جنرل سیکرٹری عدالت نوں یقین دہانی کروائی اے کہ اسیں اتھے کوئی ہنگامہ یا ہلڑ بازی نہیں کراں گے، سانوں اپنے وعدے دا پاس رکھنا اے۔

وزیراعلیٰ خیبرپختونخوا سہیل آفریدی نے کہا کہ سب توں پہلے اللہ تعالیٰ دا جو خالق و مالک اے اوہدا جتنا شکر ادا کریئے گھٹ اے، سانوں انصاف مل گیا، عدالتاں دا کم انصاف دینا اے، جے عدالتاں انصاف نہیں دیں گیاں تاں عوام کتھے جان گے؟ امید اے سپریم کورٹ دے فیصلے تے جلد عملدرآمد ہووے گا، ساڈا مطالبہ اے کہ مزید انصاف تے مبنی فیصلے سامنے آون، تحریک انصاف نال ہون والے ظلم دا ازالہ انصاف تے مبنی مزید فیصلیاں نال ای ممکن اے۔ سہیل آفریدی نے کہا کہ کوئی ورکر ایسا قدم نہ چُکے جس نال عدالتی فیصلے دی توہین ہووے۔