پاکستانی یو اے ای وچ رہ کے مخالف فریق بنن گے تاں ردِعمل تاں آوے گا: وزیرِ دفاع

ایوان نوں مکہ معاہدے تے بریفنگ لئی تیار ہاں: خواجہ آصف، لوکاں دے ویزے ایکسپائر ہو چکے نیں رینیو نہیں ہو رہے: بیرسٹر گوہر، معاملہ یو اے ای حکام نال چُکیا جاوے: اسد قیصر، بلوچستان صورتحال تے دو دن بحث کیتی جاوے: اچکزئی، اسمبلی وچ خطاب۔

اسلام آباد (نامہ نگار، سٹاف رپورٹر) وزیرِ دفاع خواجہ محمد آصف نے قومی اسمبلی وچ کہا اے کہ یو اے ای وچ مقیم پاکستانی جے اتھے رہ کے مخالف فریق بنن گے تاں ردِعمل تاں آوے گا۔ انہاں کہا کہ حالیہ جنگ وچ 90 فیصد اوہ لوک سن جنہاں نے فریق بنن دی کوشش کیتی۔ منگل نوں قومی اسمبلی اجلاس وچ ارکان دے نکتہ اعتراضات دا جواب دیندیاں خواجہ آصف نے کہا کہ اوہ 12، 14 سال یو اے ای وچ رہے نیں تے جاندے نیں کہ اتھے پاکستانیاں نال کی ہو رہا اے۔ انہاں کہا کہ مکہ امن معاہدے وچ جو امور ایوان سامنے لائے جا سکدے نیں، انہاں تے بریفنگ دتی جاوے گی، اوہ اج ایس لئی تیار نیں۔

پی ٹی آئی دے بیرسٹر گوہر نے کہا کہ یو اے ای ساڈا دوست تے مسلم ملک اے، تاہم ایران تے امریکہ وچکار جنگ توں بعد پیدا ہون والی صورتحال تے کچھ تحفظات نیں۔ پارلیمان نوں اعتماد وچ لیا جاوے۔ انہاں کہا کہ کچھ پاکستانیاں دے ویزے ایکسپائر ہو چکے نیں پر رینیو نہیں کیتے جا رہے، ایس معاملے نوں دیکھیا جاوے۔

اسد قیصر نے کہا کہ یو اے ای ساڈا برادر ملک اے، تاہم حملے ویلے سفر دوران پاکستانیاں نال انتہائی نامناسب رویہ اختیار کیتا گیا۔ معاملہ یو اے ای حکام نال چُکیا جاوے تاکہ حل نکل سکے۔

وزیرِ مملکت برائے داخلہ طلال چودھری نے کہا کہ کسے بندے دا شناختی کارڈ علاقے یا صوبے دی بنیاد تے بلاک یا منسوخ نہیں کیتا جاندا۔ وزارتِ داخلہ قومی اسمبلی وچ سکیورٹی صورتحال تے بحث لئی تیار اے، اپوزیشن جوں چاہے اک ہفتے تیکر بحث کیتی جا سکدی اے۔ انہاں کہا کہ سعودی عرب وچ 5 ہزار پاکستانی پاسپورٹ پھڑے گئے جو مبینہ طور تے افغان شہریاں نے حاصل کیتے سن۔ ملک نوں غیر ملکی عنصراں توں پاک کیتا جاوے گا۔

اپوزیشن لیڈر محمود خان اچکزئی نے بلوچستان دی صورتحال تے ایوان وچ کم از کم دو دن بحث دا مطالبہ کردیاں کہا کہ دہشت گردی سمیت مسئلے ودھ رہے نیں۔ انہاں کہا کہ اسیں گالم گلوچ نہیں سگوں گل بات تے مذاکرات دے قائل ہاں، ایس لئی پارلیمان توں بہتر کوئی تھاں نہیں۔

ایم کیو ایم دے خواجہ اظہار الحسن نے کراچی وچ رضا میر دی ہلاکت دا معاملہ چُکدیاں خصوصی کمیٹی بنان دا مطالبہ کیتا۔ رکنِ اسمبلی صبغت اللہ نے امن و امان دی صورتحال بہتر بنان تے نیشنل ایکشن پلان تے مکمل عمل درآمد دا مطالبہ کیتا۔

وفاقی وزیرِ آبی وسائل معین وٹو نے کہا کہ سارے دریا معمول مطابق وگ رہے نیں تے تربیلا ڈیم وچ وی ہڑھ (سیلاب) دی صورتحال دا باعث بنن والا پانی موجود نہیں۔ عالیہ کامران نے حج درخواستاں دی ہیلپ لائن فعال کرن، جبکہ اسد نیازی نے کراچی وچ لمبی لوڈشیڈنگ دا معاملہ چُکدیاں کے الیکٹرک دے سی ای او نوں ایوان وچ سدے جان تے کمپنی دے پنج سالہ آڈٹ دا مطالبہ کیتا۔