چیف الیکشن کمشنر دی ملاقات، ووٹ وچ خیانت دے اثرات مدتاں تیکر بھگتنے پیندے نیں: گورنر پنجاب

الیکشن اصلاحات لئی مزید اقدام، انتخابی عمل مؤثر تے شفاف بنان، ووٹراں دے اندراج تے دوجے امور تے تبادلہ خیال: ملک وچ جمہوری نظام توں علاوہ کوئی دوجا راہ نہیں، ایسے وچ بہتری لیانا وقت دی لوڑ اے: سردار سلیم حیدر

لاہور (سٹاف رپورٹر توں) گورنر پنجاب سردار سلیم حیدر خان نال چیف الیکشن کمشنر آف پاکستان سکندر سلطان راجہ نے گورنر ہاؤس لاہور وچ لنگھے دن ملاقات کیتی اے۔ ایس دوران انتخابات وچ اصلاحات لئی مزید اقداماں، انتخابی عمل نوں مؤثر تے شفاف بنان، ووٹراں دے اندراج سمیت مختلف امور تے تفصیلی تبادلہ خیال کیتا گیا۔ گورنر پنجاب نے گفتگو کردیاں کہا کہ انتخابی عمل نوں مؤثر تے شفاف بنانا الیکشن کمیشن دی بنیادی ذمہ داری اے، ووٹ عوام دی امانت اے تے ایس وچ کیتی جان والی خیانت دے اثرات قوماں مدتاں تیکر بھگتدیاں نیں، ایسا ضابطہ اخلاق تیار کیتا جانا چاہیدا اے جس نال انتخابی شفافیت وچ اضافہ ہووے تے عوام دا جمہوری عمل تے اعتماد مزید مضبوط ہووے۔

سردار سلیم حیدر خان نے مزید کہا کہ ملک وچ جمہوری نظام توں علاوہ کوئی دوجا راہ نہیں، ایسے نظام وچ بہتری لیانا وقت دی لوڑ اے، قوم دی خواہش اے کہ انتخابات شفاف تے غیر جانبدار انداز وچ منعقد ہون، ملک وچ حقیقی تبدیلی صرف عوام ای لے کے آ سکدے نیں۔ گورنر پنجاب نے مستحکم جمہوری نظام لئی ہر فرد دے فعال کردار نوں ضروری قرار دیندیاں کہا کہ تمام سیاسی جماعتاں دی ذمہ داری اے کہ اوہ ووٹ دے تقدس نوں برقرار رکھن، الیکشن کمیشن آؤن والے انتخابات توں پہلے ووٹراں دے اندراج نوں یقینی بنائے، انتخابی عمل دے ہر مرحلے وچ شفافیت تے اعتماد نوں یقینی بنانا ضروری اے۔