پیپلز پارٹی دے وفد دی اچکزئی نال ملاقات: اسٹیبلشمنٹ تے حکومت دا اک پیج ہو سکدا اے پر دال وچ کچھ کالا اے، اج یا کل سامنے آ جائے گا: بلاول

عمران خان نوں ہسپتال منتقل کرن دا فیصلہ جی آیاں نوں، محسن نقوی نا تجربہ کار، اوہ موجودہ نظام دی گل کر رہے نے تے الٹی گنتی والا بیان صحیح سمجھو: چیئرمین پی پی پی، حکومت کجھ دہاڑیاں دی پروہنی: اپوزیشن لیڈر۔ سپیکر قومی اسمبلی نال پی ٹی آئی آگوآں دی ملاقات، عمران کوئی ڈیل نہیں کر رہے، عدالتی فیصلہ منیا جاوے: اسد قیصر، بیرسٹر گوہر، عمران نوں ہسپتال منتقل نہ کیتا تے توہینِ عدالت ہووے گی: سلمان اکرم۔

اسلام آباد پاکستان پیپلز پارٹی دے چیئرمین بلاول بھٹو زرداری نے قومی اسمبلی دے اپوزیشن چیمبر وچ نیشنل اسمبلی دے قائدِ حزبِ اختلاف محمود خان اچکزئی تے سینیٹ وچ اپوزیشن لیڈر علامہ راجہ ناصر عباس نال ملاقات کیتی۔ ایس موقعے تے پاکستان تحریکِ انصاف دے سیکرٹری جنرل سلمان اکرم راجہ، تحریکِ تحفظِ آئینِ پاکستان دے سیکرٹری جنرل اسد قیصر، تحریکِ تحفظِ آئینِ پاکستان دے وائس چیئرمین مصطفیٰ نواز کھوکھر، قومی اسمبلی وچ پی ٹی آئی دے چیف وہپ عامر ڈوگر، رکنِ قومی اسمبلی عادل بازئی تے تحریکِ تحفظِ آئینِ پاکستان دے ترجمان اخوندزادہ حسین وی موجود سن، جبکہ چیئرمین بلاول بھٹو زرداری دے نال راجہ پرویز اشرف، شیری رحمان، نوید قمر تے ندیم افضل چن موجود سن۔ چیئرمین بلاول بھٹو زرداری تے پارلیمان وچ حزبِ اختلاف دے آگوآں وچکار پارلیمانی معاملیاں تے دیس دی سیاست تے گل بات ہوئی۔

چیئرمین بلاول بھٹو زرداری نے پارلیمان وچ حزبِ اختلاف دے آگوآں نوں ارج کیتی کہ اوہ پارلیمانی کمیٹیاں وچ شامل ہو کے وادھو کردار ادا کرن، جِس تے اپوزیشن آگوآں نے آکھیا کہ اوہ پی ٹی آئی چیئرمین نال مشورہ کرن توں بعد فیصلہ کرن گے، جبکہ پیپلز پارٹی تے قائدینِ حزبِ اختلاف نے پارلیمان وچ قانون سازی دے حوالے نال رابطے ودھاون تے اتفاق کیتا۔ بلاول بھٹو زرداری نے پارلیمان وچ حزبِ اختلاف دے آگوآں نوں آکھیا کہ تسیں چوناں وچ شفافیت پکی کرن لئی چونا اصلاحات دے سلسلے وچ پارلیمان وچ اپنا کردار ادا کرو۔ بلاول بھٹو نے ملاقات توں بعد میڈیا نال گل بات کردیاں سپریم کورٹ دے فیصلے دے نتیجے وچ عمران خان نوں ہسپتال منتقل کرن تے علاج نوں جی آیاں نوں آکھدیاں کیہا کہ ایہ اک جمہوری روایت اے۔ چنگا ہوندا کہ سپریم کورٹ دے فیصلے توں پہلے حکومت قدم چکدی، اوہناں نے حکومتی قدماں تے تنقید کردیاں آکھیا کہ حکومت تے اسٹیبلشمنٹ دا اک پیج ہو سکدا اے، پر اوہناں دے وچکار دال وچ کجھ کالا اے جو اج نہیں تے کل سامنے آ جاوے گا۔ نویں صوبیاں دے متعلق سوال تے آکھیا کہ پی پی پی عوام تے عوام دی رائے نال کھلووے گی تے جو قدم عوامی اتفاقِ رائے نال کیتا جاوے گا پی پی پی اوہدا ساتھ دیوے گی، اساں زور زبردستی نال کسے شے نوں پہلے منیا اے نہ اج مناں گے تے نہ اگے مناں گے۔ اگر حکومت کانفیڈنٹ اے کہ پی پی پی دی لوڑ نہیں اے تے کوئی مسئلہ نہیں۔

وزیراعظم دے آسے پاسے ایسے لوک نے جو اوہناں دیاں کوشلاں نوں ناکام بنا دیندے نے، جے قانون سازی لئی حکومت کول ممبر پورے نے تے “والد” صاحب نوں منا لین پھر دستخط ہوݨ گے، پاکستان دے ویری نہیں چاہندے کہ دیس معاشی تے سیاسی طور تے کامیاب ہووے۔ اسرائیل تے بھارت ورگیاں طاقتاں “آپریشن سندور” ورگے منصوبیاں راہیں پاکستان وچ بے امنی کھنڈاون دی سازش کر رہیاں نے۔ سانوں ایہناں ارادیاں نوں ناکام بنان لئی قومی یکجہتی، بہتر خارجہ پالیسی تے اندرونی سیاسی استحکام نوں پکا کرنا ہووے گا۔ ان ہاؤس تبدیلی تے فوکس نہیں، میں چاہندا آں پارلیمان اپنا کردار ادا کرے، اپوزیشن دا پارلیمنٹ توں پرھے رہن دا فیصلہ سیاسی طور تے وی صحیح نہیں تے جمہوری روایات دے وی خلاف اے۔ کشمیر ورگا نازک علاقہ سی ایتھے غیر متنازعہ الیکشن ہونا چاہیدا سی، ہسے وی کئی حلقیاں وچ چوناں ہونیاں نے، متنازعہ الیکشن توں بعد متنازعہ حکومت چاہیدی اے تے مسلم لیگ (ن) نوں مبارک ہووے، مینوں اوہ موقع نظر نہیں آؤندا کہ اسیں اوتھے جمہوری روایات تے کشمیر دی پارلیمان نوں تکڑا کریے۔ میری پارٹی دا فیصلہ اے مسلم لیگ (ن) نال کوآرڈینیشن تے قانون سازی وچ تعاون نہیں ہووے گا جے تیکر ساڈے تحفظات دور نہیں ہوندے، جے ایہو جیہا کوئی قانون آئے جو قومی مفاد دا ہووے گا اوہدا ساتھ دیواں گے۔

اک سوال تے اوہناں آکھیا کہ ڈی جی آئی ایس پی آر نے کوئی موقف نہیں دتا سی سگوں صرف اک سوال دا جواب دتا سی، صوبیاں دے حوالے نال پیپلز پارٹی دا موقف بالکل صاف اے کہ اتفاقِ رائے ہووے تے صوبہ بنایا جاوے، بلاول بھٹو نے سوال کیتا کہ سندھ توں صوبے بنن دیاں کنیاں قرارداداں منظور ہوئیاں، ایس دا جواب دینا چاہیدا اے، پنجاب تے دوجے صوبیاں وچ قرارداداں منظور ہوئیاں نے، جِس دا اسیں احترام کردے آں تے سندھ اسمبلی دی قرارداد دی کس طرحاں مخالفت کیتی جاوے۔ حکومت ولوں جے رابطہ کیتا گیا تے ضرور گل بات کرا گے، پر جے تیکر پیپلز پارٹی نوں انصاف نہیں ملدا اوہدوں تیکر حکومت نال تعاون نہیں ہووے گا، آزاد کشمیر وچ پیپلز پارٹی اپوزیشن وچ بیٹھے گی۔ نظام ناکارہ ہونا کافی بھاری لفظ اے، محسن نقوی سیاست وچ ایڈا تجربہ نہیں رکھدے، جے اوہ موجودہ نظام دی گل کر رہے نے کہ کلیپس تے پھر میرے الٹی گنتی والے بیان نوں صحیح سمجھو۔ اپوزیشن لیڈر قومی اسمبلی محمود خان اچکزئی نے آکھیا حکومت کجھ دہاڑیاں دی پروہنی اے، نظام دی بجائی منہ بدلن نال پاکستان ایتھے تیکر پہنچیا، اک قومی حکومت بنائی جاوے جو الیکشن کروائے۔ بانی پی ٹی آئی نوں ہسپتال منتقل کرنا تے ساتھیاں دی ملاقات اوہناں دا حق اے، نظام دی بجائی منہ بدلن نال پاکستان ایتھے تیکر پہنچیا۔

چیئرمین پی ٹی آئی بیرسٹر گوہر نے آکھیا کہ عمران خان کوئی ڈیل نہیں کر رہے، میری درخواست اے عمران خان دے علاج دے متعلق سپریم کورٹ دے آرڈر تے عمل درآمد ہوݨ دتا جاوے، بڑی اوکھیائی تے لمے ویلے توں بعد اسیں ایس فیصلے تے پہنچے آں، میں دونوں دھراں نوں آکھاں گا کہ ایس کم نوں سبوتاژ نہ کرن۔ ادھر سپیکر پارلیمنٹ ہاؤس وچ قومی اسمبلی ایاز صادق نال تحریکِ انصاف دے آگوآں نے ملاقات کیتی جِس وچ دیس دے سیاسی معاملیاں تے مشورہ کیتا گیا۔ ملاقات وچ اسد قیصر، جنید اکبر تے دوجے موجود سن، سابق سیکرٹری جنرل پی ٹی آئی اسد عمر وی سپیکر چیمبر وچ پہنچے، پی ٹی آئی آگو اسد قیصر نے آکھیا کہ سپریم کورٹ دے احکامات تے عمل درآمد لئی اسیں سپیکر نوں ملے آں، اسیں چاہندے آں کہ سپریم کورٹ دا فیصلہ جیویں دا تیویں منیا جاوے۔ اعظم نذیر تارڑ تے خواجہ آصف دے بیانات تے بہت دکھ تے افسوس ہویا۔ کی اعظم نذیر بھول گئے نے کہ نواز شریف جَدوں لگ بھگ اک سال جیل وچ سن تے اوہناں نے کنیاں وار میڈیکل ٹریٹمنٹ لئی درخواست دتی تے کنیاں وار علاج کروایا؟ پی ٹی آئی دے سیکرٹری جنرل سلمان اکرم راجہ نے آکھیا کہ سپریم کورٹ دے آرڈر تے حکومت کول اج تیکر دا ویلا اے، جے عمران خان نوں ہسپتال منتقل نہ کیتا گیا تے توہینِ عدالت ہووے گی۔ مینوں نظر نہیں آؤندا، حکومت دی نظرثانی درخواست ہلے سنی جاوے گی کیونکہ سپریم کورٹ وچ کوئی درخواست دائر کیتی جاندی اے تے پڑتال وچ چار چھ دن لگ جاندے نے۔