قومی اسمبلی: وزیر غائب، اپوزیشن دا احتجاج، کورم وی ادھورا، اجلاس ملتوی کرنا پیا

ایوان تے لوکاں دے کروڑاں روپئے خرچ ہوندے نے، ایس ویلے تیکر بائیکاٹ کراں گے جَدوں تیکر وزرا دیاں دو لائناں پوریاں نہیں ہوندیاں: عامر ڈوگر۔ پیپلز پارٹی الزام لاؤن توں پہلے ایوان دی کارروائی دا ریکارڈ چیک کر لیا کرے، جے میں جھوٹھا ہواں تے استعفیٰ دیواں گا، نہیں تے ایہہ دین: طارق فضل۔

اسلام آباد (نامہ نگار، سٹاف رپورٹر، آن لائن): قومی اسمبلی دا اجلاس ڈپٹی سپیکر سید غلام مصطفیٰ شاہ دی صدارت ہیٹھ شروع ہوندے ہی اپوزیشن نے وزرا دی عدم موجودگی تے احتجاج کردیاں کورم دی نشاندہی کر دتی، گنتی کراون تے کورم پورا نہ نکلیا جِس پاروں اجلاس دی کارروائی کورم پورا ہوݨ تیکر ملتوی کرنی پئی۔ وقفہِ سوالات دے دوران پی ٹی آئی دے رکنِ قومی اسمبلی ملک عامر ڈوگر نے آکھیا کہ سوالاں دے جواب دین لئی متعلقہ وزیر ڈاکٹر طارق فضل ایوان وچ موجود نہیں، حکومتی وزرا دی ایوان دی کارروائی چلاؤن وچ دلچسپی سبھ دے سامنے اے۔ ملک عامر ڈوگر نے آکھیا کہ ایس ایوان تے لوکاں دے کروڑاں روپئے خرچ ہوندے نے، اوہ ایس ویلے تیکر بائیکاٹ کرن گے جَدوں تیکر وزرا دیاں دو لائناں پوریاں نہیں ہوندیاں۔ اوہناں نے آکھیا کہ میں بائیکاٹ وی کر رہیا آں تے کورم دی نشاندہی وی کر رہیا آں۔ ملک عامر ڈوگر دی تقریر دے دوران ڈاکٹر طارق فضل ایوان وچ آ گئے جِس تے اوہناں آکھیا کہ ایس توں پہلے کہ خالی کرسیاں دی ویڈیو بناندا، طارق فضل آ گئے نے۔ کورم دی نشاندہی توں بعد پی ٹی آئی ارکان ایوان توں باہر چلے گئے، گنتی کراون تے کورم پورا نہ نکلیا، ڈپٹی سپیکر نے اجلاس دی کارروائی کورم پورا ہوݨ تیکر ملتوی کر دتی۔

ایس توں علاوہ اسمبلی وچ خطاب کردیاں وفاقی وزیرِ پارلیمانی امور طارق فضل چوہدری نے آکھیا جے میں غلط ہواں تے استعفیٰ دیواں گا نہیں تے ایہہ استعفیٰ دین۔ وفاقی وزیر نے آکھیا کہ پیپلز پارٹی والے الزام لاؤن توں پہلے ایوان دی کارروائی دا ریکارڈ چیک کر لیا کرن۔ صومالیہ وچ 10 پاکستانیوں دے بحری قزاقاں دے قبضے دا معاملہ کل وی زیرِ بحث آیا سی، جے میں غلط ہواں تے استعفیٰ دے دیواں گا نہیں تے ایہہ استعفیٰ دین۔ طارق فضل نے ہور آکھیا کہ صومالیہ وچ 10 پاکستانی بحری قزاقاں دے قبضے وچ نے، صومالیہ نال ساڈے سفارتی تعلقات نہیں نے۔ اوہناں دا کہنا سی کہ جبوتی تے لندن سفارتخانے راہیں معاملہ حل کرن دی کوشش کر رہے آں، دفترِ خارجہ معاملے نوں متحرک انداز وچ دیکھ رہیا اے۔ وفاقی وزیرِ پارلیمانی امور نے ایہہ وی آکھیا کہ ساڈی پوری کوشش اے کہ چھیتی ایہہ معاملہ حل ہووے، اسیں ہوا وچ کوئی گل نہیں کردے، فارن آفس راہیں ہر ممکن کوشش ہو رہی اے۔ اوہناں آکھیا کہ ایہہ بحری جہاز ایس علاقے وچ اے جتھے صومالی حکومت دی عملداری نہیں، پلاؤ ناؤ دا دیس وی ایس جہاز نوں اون نہیں کر رہیا۔ طارق فضل نے آکھیا کہ صومالیہ دے قزاقاں نے 3 ملین ڈالر دا تاوان منگیا ہویا اے، تاوان دے دیئے تے ایہو جیہے واقعات وچ وادھا ہو سکدا اے، ایس جہاز توں بعد 4 ہور جہاز وی اغوا ہوئے نے۔ الیکشن کمیشن پاکستان دی سالانہ رپورٹ 2025 سمیت 4 وکھ وکھ رپورٹاں تے ٹیکنالوجی و مینجمنٹ سائنسز ترمیمی بل 2026 قومی اسمبلی وچ پیش کر دتے گئے نے۔