عمران خان نوں شفاء ہسپتال منتقل کرن دے حکم خلاف وفاقی حکومت دی نظرثانی درخواست
عبوری حکم اختیارِ سماعت توں باہر، فریق نہ ہوݨ دے باوجود میرے اختیارات نوں سِپھاں اثرانداز کردا اے: چیف کمشنر اسلام آباد۔ ساریاں استدعاواں منظور، حتمی فیصلے لئی کجھ باقی نہ رہا، ہسپتال منتقلی دے قانونی طریقے نوں پاسے کیتا گیا، درخواست وچ موقف۔
اسلام آباد (کورٹ رپورٹر): وفاقی حکومت نے بانی پی ٹی آئی عمران خان نوں شفاء انٹرنیشنل ہسپتال منتقل کرن نال متعلق سپریم کورٹ دے 18 اگست دے عبوری حکم تے نظرثانی دی درخواست دائر کر دتی اے۔ درخواست چیف کمشنر اسلام آباد ولوں ایڈووکیٹ جنرل اسلام آباد دے راہیں دائر کیتی گئی جِس وچ موقف اختیار کیتا گیا اے کہ سپریم کورٹ دا عبوری حکم اختیارِ سماعت توں باہر اے تے ایس راہیں قیدی نوں ہسپتال منتقل کرن دے مقررہ قانونی طریقے نوں پاسے کیتا گیا۔ درخواست موجب 5 اگست 2023 نوں بانی پی ٹی آئی نوں ایڈیشنل سیشن جج نے تن سال قید دی سزا سنائی جِس خلاف اسلام آباد ہائی کورٹ وچ اپیل دائر کیتی گئی۔ دورانِ مقدمہ بانی پی ٹی آئی نے ضابطہ فوجداری دی دفعہ 561-A تحت علاج لئی شفاء انٹرنیشنل ہسپتال منتقل کرن دی درخواست کیتی پر اسلام آباد ہائی کورٹ نے 12 مارچ 2026 نوں درخواست ردّ کر دتی جِس خلاف سپریم کورٹ وچ اپیل دائر کیتی گئی۔
چیف کمشنر دی درخواست وچ پاکستان پریزن رولز 1978 دے رول 197 دا حوالہ دیندیاں آکھیا گیا اے کہ قیدی نوں جیل توں باہر ہسپتال منتقل کرن دا باقاعدہ قانونی طریقہ موجود اے۔ دوجے سٹیشن دے ہسپتال منتقلی لئی انسپکٹر جنرل جیل خانہ جات دی پیشگی منظوری ضروری اے جبکہ منتقلی دی صورت وچ حکومت نوں ترت رپورٹ دینا وی لازمی اے۔ جیل توں باہر ہسپتال وچ داخل قیدی دی سکیورٹی پولیس دے ذمے ہوندی اے جبکہ قیدی دے علاج نال متعلق ہسپتال دے خرچے محکمہ صحت برداشت کردا اے۔ آپریشن دی صورت وچ قیدی نوں جِنّا ہو سکے مقررہ ویلے دے نیڑے ہسپتال منتقل تے آپریشن توں بعد چھیتی توں چھیتی جیل ہسپتال موڑیا جانا چاہیدا اے۔ چیف کمشنر نے موقف اختیار کیتا کہ 18 اگست دا حکم اوہناں دے آئینی تے قانونی اختیارات نوں سِپھاں اثرانداز کردا اے، حالانکہ اوہناں نوں مقدمے وچ فریق نہیں بنایا گیا سی۔ معاملہ پہلی وار سپریم کورٹ دے سامنے لایا گیا سی تے متعلقہ دھراں نوں باقاعدہ نوٹس جاری نہیں کیتا گیا سی۔ منصفانہ ٹرائل تے قانونی طریقے تحت دھراں نوں سنن دا ہاڑا موقع دینا ضروری اے۔ عدالت نے نال جڑے مقدمیاں وچ جمع کروائی گئی اک رپورٹ دی بنیاد تے بانی پی ٹی آئی دی صحت وگرن دا مڈھلا تاثر قائم کیتا پر ایس رپورٹ وچ صحت ہور خراب ہوݨ دی کوئی واضع نشاندہی موجود نہیں سی۔
عدالت لئی ٹھیک طریقہ ایہہ سی کہ کسے طبی ماہر توں رپورٹ تے رائے لئی جاندی تے ایس توں بعد ایہہ طے کیتا جاندا کہ آیا بانی پی ٹی آئی دی صحت وگرن دے ثبوت موجود نے کہ نہیں۔ درخواست گزار موجب بانی پی ٹی آئی نے شفاء انٹرنیشنل ہسپتال منتقلی توں وکھ اپنے ذاتی معالجاں ڈاکٹر فیصل سلطان تے ڈاکٹر عاصم یوسف نوں علاج وچ شامل کرن، گھر والیاں نوں صحت توں جانو کرواون تے علاج دوران مناسب ملاقات دی اجازت دین دی استدعا کیتی سی۔ طبی رپورٹاں تے معائنے دیاں تصدیق شدہ کاپیاں وکیل نوں دین دی درخواست وی کیتی گئی سی۔ سپریم کورٹ نے اپنے عبوری حکم راہیں بانی پی ٹی آئی دیاں چاروں استدعاواں مکمل طور تے منظور کر لئیاں جِس نال پورا معاملہ عبوری مرحلے تے ای طے ہو گیا تے حتمی فیصلے لئی کجھ باقی نہ رہا۔ قابلِ سماعت ہوݨ دے اہم سوال نوں پاسے رکھ کے عبوری حکم جاری کیتا گیا۔ درخواست وچ سپریم کورٹ توں استدعا کیتی گئی اے کہ چیف کمشنر اسلام آباد نوں نظرثانی درخواست دائر کرن دی اجازت دتی جاوے، 18 اگست دا عبوری حکم موڑیا جاوے تے ایس نوں سپریم کورٹ دے طے شدہ قانونی اصولاں دے خلاف قرار دیندیاں کالعدم کیتا جاوے۔
