وزیرِ داخلہ دا پاسپورٹ دفتر گارڈن ٹاؤن دا دورہ، بدانتظامی تے غصے وچ
بہت سارے کاؤنٹر خالی لبھے، کئی تھاواں تے عملہ وی نہیں سی، لوکاں دے شکویاں دے ڈھیر۔ انچارج ڈپٹی ڈائریکٹر، ایجنٹ مافیا دی موجودگی تے ڈپٹی ڈائریکٹر اینٹی کرپشن نوں ہٹاون دا حکم۔
لاہور وفاقی وزیرِ داخلہ محسن نقوی نے گارڈن ٹاؤن پاسپورٹ آفس لاہور دا اچانک دورہ کیتا تے لوکاں دیاں لمیاں لائناں، کئی کئی گھنٹیاں دا انتظار تے ایجنٹ مافیا دیاں کارروائیاں دیکھ کے شدید غصے دا اظہار کیتا۔ دورے دے دوران بہت سارے کاؤنٹر خالی لبھے، کئی تھاواں تے عملہ وی موجود نہیں سی۔ لوکاں نے ملاقات تے وزیرِ داخلہ نوں شکویاں دے ڈھیر لا دتے تے پاسپورٹ دفتر پیش آؤن والیاں اوکڑاں تے دوجے مسائل توں جانو کروایا۔ لوکاں نے دَسیا کہ اوہ سویرے توں پاسپورٹ بنواون لئی موجود نے، کئی گھنٹے لنگھن دے باوجود اوہناں دی واری نہیں آئی۔ اک شہری نے گلہ کیتا کہ اوہ چار گھنٹیاں توں انتظار کر رہیا اے، اک ہور شہری نے دَسیا کہ پاسپورٹ چھیتی بنواون لئی دفتر دے باہر ایجنٹ نوں 5500 روپئے دتے، لوکاں دا کہنا سی کہ ایجنٹ دفتر دے باہر سرِعام چھیتی کم کراون دے بدلے پیسے منگدے نے۔ اک بڈھے شہری نے گلہ کیتا کہ اوہنویں اج پاسپورٹ ملنا سی پر عملے نے دَسیا کہ اوہدا پاسپورٹ ہلے پرنٹ نہیں ہویا۔
صورتحال دا جائزہ لین توں بعد محسن نقوی نے پاسپورٹ آفس وچ بدانتظامی تے فرضاں توں غفلت تے شدید غصے دا اظہار کیتا، بدانتظامی تے فرضاں توں غفلت تے پاسپورٹ آفس دے انچارج ڈپٹی ڈائریکٹر شہزاد اسلم نوں عہدے توں ہٹاون دا حکم دتا۔ وزیرِ داخلہ نے پاسپورٹ آفس دے باہر ایجنٹ مافیا دی موجودگی دا وی سخت نوٹس لیا تے ڈپٹی ڈائریکٹر اینٹی کرپشن ایف آئی اے لاہور نوں وی ہٹاون دا حکم دے دتا۔ محسن نقوی نے لوکاں دے شکویاں دے ازالے لئی موقعے تے ای ضروری احکامات جاری کیتے تے ہدایت کیتی کہ لوکاں نوں پاسپورٹ ملن وچ وادھو انتظار تے اوکڑاں توں چھٹکارا دواون لئی ترت قدم چکے جاݨ۔ وزیرِ داخلہ نے لوکاں نال گل بات کردیاں آکھیا کہ میں تواڈے توں ذاتی طور تے معافی منگدا آں، ایہو جیہا سلوک بہت افسوسناک تے برداشت توں باہر اے۔ پاسپورٹ دفتر وچ لوکاں نوں تیز رفتار سہولتاں دی تیاری تے کوئی سمجھوتہ نہیں ہووے گا، کوتاہی یا غفلت تے بغیر کسے وکھریویں دے کارروائی کیتی جاوے گی۔ لوکاں نوں سہولتاں دینا حکومت دی ذمہ داری تے فرض اے، پاسپورٹ دفتراں وچ لوکاں نوں آؤن والیاں اوکڑاں ترت دور کیتیاں جاݨ تے سہولتاں دین دا عمل ہور موثر بنایا جاوے۔
