قومی اسمبلی وچ ن لیگ نوں پیپلز پارٹی توں وکھ وی سادھی اکثریت حاصل
ن لیگ نوں پیپلز پارٹی توں وکھ 170 ممبراں دی حمایت، سادھی اکثریت لئی 169 ممبر چاہیدے نے۔ پی پی حکمران اتحاد توں وکھ ہوئی تے صدر دے مواخذے سمیت سینیٹ دی سربراہی توں ہتھ دھووے گی۔
اسلام آباد (سہیل خان): حکمران جماعت نوں قومی اسمبلی وچ نمبرز گیم وچ برتری مل گئی اے، کسے جماعت دے وکھ ہوݨ نال حکومت نوں کوئی فرق نہیں پئے گا۔ ہن حکمران جماعت نوں وڈی اتحادی جماعت پیپلز پارٹی دیاں وِساخیاں دی لوڑ نہیں رہی۔ مسلم لیگ (ن) نے سادھی اکثریت نال پیش قدمی برقرار رکھدیاں 170 توں وادھ ممبراں دی حمایت حاصل کر لئی اے۔ دستاویزات موجب پیپلز پارٹی توں وکھ مسلم لیگ (ن) نوں 170 ممبراں دی حمایت حاصل اے۔ حکمران اتحاد دے ذرائع دا کہنا اے کہ کسے سیاسی جماعت دے وکھ ہوݨ نال حکومت نوں فرق نہیں پئے گا، ایس لئی حکومت نال متعلق بلاول بھٹو زرداری دے بیاناں نوں کسے پدھر تے سنجیدگی نال نہیں لیا گیا۔ حکومت نے اپوزیشن وچ وی نویں رابطیاں دا سلسلہ شروع کر دتا اے۔ صدرِ مملکت وی کسے صورت سخت ردِعمل دے پیشِ نظر موقع آؤݨ دے باوجود وزیراعظم نوں اعتماد دا ووٹ لین لئی نہیں کہݨ گے۔ پی ٹی آئی دی پیپلز پارٹی نال ممکنہ حکومت سازی دیاں افواہاں تے بانی چیئرمین عمران خان نے وی سخت ناپسندیدگی دا اظہار کیتا اے۔
دَسیا گیا اے کہ پیپلز پارٹی کلہم کلا (تنہائی دا شکار) ہو گئی اے۔ قومی اسمبلی دے ممبراں دی کل گنتی 336 اے جبکہ سادھی اکثریت لئی 169 ممبراں دی حمایت چاہیدی اے۔ ایس ویلے پیپلز پارٹی سمیت حکمران اتحاد وچ شامل ممبراں دی گنتی 243 اے جو دو تہائی اکثریت توں وی وادھ اے۔ حکمران اتحاد وچ مسلم لیگ (ن) دے 131، پیپلز پارٹی دے 74، ایم کیو ایم دے 22، مسلم لیگ (ق) دے 5، استحکام پاکستان پارٹی دے 4، ضیاء لیگ، بلوچستان عوامی پارٹی تے نیشنل پارٹی دا اک اک، جبکہ 4 آزاد ممبر شامل نے۔ جے ویلھے پیپلز پارٹی دی حکومت توں ممکنہ علیحدگی دا دور دور تیکر امکان نہیں، تاہم ایس دے ساتھ چھڈن دی صورت وچ حکومتی اتحاد دو تہائی اکثریت توں محروم ہو جاوے گا۔ پیپلز پارٹی دے حکمران اتحاد توں وکھ ہو کے اپوزیشن اتحاد وچ شامل ہوݨ دی صورت وچ حکومتی اتحاد تے اپوزیشن دے ممبراں دی گنتی وچ فرق صرف 6 ممبراں دا رہ جاوے گا، جبکہ اپوزیشن اتحاد دے کل ممبراں دی گنتی 163 ہو جاوے گی۔ جمہوری حلقیاں موجب پیپلز پارٹی جے حکمران اتحاد توں وکھ ہوئی تے صدر دے مواخذے سمیت سینیٹ چیئرمین تے ڈپٹی سپیکر قومی اسمبلی دے عہدیاں توں محروم ہو سکدی اے۔ بلوچستان حکومت، گورنر پنجاب تے گورنر خیبر پختونخوا دے عہدیاں تے وی خطرہ پیدا ہو سکدا اے۔
