عمران خان نوں جیل توں ہسپتال منتقل کر دتا گیا اے۔

بانی پی ٹی آئی دی اڈیالہ جیل توں ہسپتال منتقلی توں پہلاں اوہناں دے ذاتی معالج ڈاکٹر فیصل تے بھین ڈاکٹر عظمیٰ دی موجودگی وچ معائنہ کیتا گیا۔ سکیورٹی سخت کر دتی گئی اے تے پارٹی نے کارکنان نوں آؤن توں روک دتا اے۔ سپریم کورٹ دے حکم دی روشنی وچ حکومت ہسپتال انتظامیہ دی مشاورت نال میڈیکل بورڈ بنائے گی، جیہدے وچ فزیشن، سرجن، انٹرنل میڈیسن، ماہر امراضِ چشم تے ماہر امراضِ قلب شامل ہوݨ گے۔

اسلام آباد (مانیٹرنگ ڈیسک) حکومت نے سپریم کورٹ دے حکم تے عمل کردیاں بانی پی ٹی آئی عمران خان نوں شفا انٹرنیشنل ہسپتال منتقل کر دتا اے۔ ہسپتال منتقلی توں پہلاں اڈیالہ جیل وچ عمران خان دا تفصیلی معائنہ کیتا گیا، ایس موقعے تے اوہناں دے ذاتی معالج ڈاکٹر فیصل تے اوہناں دی بھین ڈاکٹر عظمیٰ وی موجود سن۔ ذرائع دے مطابق سپریم کورٹ دے حکم دی روشنی وچ حکومت شفا ہسپتال دی انتظامیہ دی مشاورت نال میڈیکل بورڈ تشکیل دے گی، جیہدے وچ اک فزیشن، جنرل سرجن، انٹرنل میڈیسن، ماہر امراضِ چشم تے ماہر امراضِ قلب شامل ہوئے گا۔ میڈیکل بورڈ بانی پی ٹی آئی دا معائنہ تے علاج کرے گا۔

ڈاکٹر فیصل سلطان تے بانی پی ٹی آئی دی بھین ڈاکٹر عظمیٰ خان نوں طبی معائنے تے علاج دے دوران موجود رہݨ دی اجازت ہوئے گی۔ ہسپتال دے خرچے بانی پی ٹی آئی دا ٹبر برداشت کرے گا۔ بانی پی ٹی آئی دی جیل توں منتقلی توں پہلاں ہسپتال دے آلے دوالے سکیورٹی دے سخت انتظام کیتے گئے سن، ہسپتال دے آلے دوالے وادھو نفری تعینات کیتی گئی سی۔ سکیورٹی حکام نے کئی راستے ٹریفک لئی بند کر دتے سن۔ حکام دے مطابق ہسپتال ول جاݨ والے اہم راستیاں تے بیریئر لا دتے گئے نیں تے آؤن جاݨ دی نگرانی سخت کر دتی گئی اے۔ سکیورٹی انتظاماں پاروں ہسپتال دے آلے دوالے ٹریفک دی روانی وی متاثر ہوݨ دا امکان اے۔ ذرائع دے مطابق پی ٹی آئی دی قیادت نے اپنے کارکنان نوں ہسپتال جاݨ توں روک دتا اے۔