مولانا فضل الرحمٰن تے اچکزئی دا متحدہ اپوزیشن تے اتفاق: وفاقی حکومت دا پی پی نوں مناون لئی رابطہ۔

اپوزیشن آگوآں دا پارلیمنٹ وچ حکومتی رویے تے چنتا دا اظہار، سانجھی حکمت عملی طے کرن گے: سربراہ جے یو آئی۔ ایاز صادق نال راجہ پرویز دی اگواہی وچ وفد دی ملاقات، گِلیاں دے ڈھیر لا دتے، تحفظات دور کیتے جان گے: اسحاق ڈار۔

اسلام آباد (آن لائن، مانیٹرنگ ڈیسک) جمعیت علمائے اسلام (ف) دے سربراہ مولانا فضل الرحمن نے قومی اسمبلی وچ قائد حزب اختلاف محمود خان اچکزئی نال گزری دہاڑے اپوزیشن چیمبر وچ ملاقات کیتی۔ ایس دوران ملکی سیاسی صورتحال، پارلیمانی معاملیاں، اپوزیشن جماعتاں دے آپسی تعاون تے آؤندے ویلے دی سیاسی حکمت عملی تے تفصیلی گل بات توں بعد متحدہ اپوزیشن بناون تے اتفاق کر لیا گیا۔ ملاقات وچ پاکستان تحریک انصاف دے مرکزی آگو اسد قیصر، اپوزیشن دے پارلیمانی لیڈر شاہد خٹک، چیف وہپ عامر ڈوگر، عاطف خان، شہرام ترکئی، ثناء اللہ مستی خیل، علی اصغر خان، آصف محسود تے تحریک تحفظ آئین پاکستان دے ترجمان اخونزادہ حسین یوسفزئی جبکہ جے یو آئی (ف) ولوں رکن قومی اسمبلی عثمان بادینی، سینیٹر کامران مرتضیٰ، سینیٹر مولانا عبدالواسع تے مولانا کمال الدین موجود سن۔ ملاقات دوران بانی پی ٹی آئی عمران خان دی صحت دے حوالے نال وڈی چنتا دا اظہار کیتا گیا۔

اپوزیشن آگوآں نے منگ کیتی کہ سابق وزیراعظم دی صحت دے معاملے تے کسے قسم دی سیاست نہیں ہونی چاہی دی۔ ملاقات وچ قومی اسمبلی تے سینیٹ وچ اپوزیشن نال حکومتی رویے تے برتاؤ تے وی چنتا دا اظہار کیتا گیا۔ ملاقات توں پہلاں میڈیا نال نکی جیہی گل بات وچ مولانا فضل الرحمن نے کہیا کہ جے اوہناں دے وس وچ ہوندا تاں ہن تک بانی پی ٹی آئی دا علاج وی ہو چکا ہوندا، جبکہ ملاقات توں بعد میڈیا نال گل بات وچ اوہناں کہیا کہ فیصلہ کیتا اے کہ متحدہ اپوزیشن بنائی جاوے گی، متحدہ اپوزیشن دے حوالے نال ایہ مڈھلی نشست سی تے آؤندے ویلے دی ملورت توں بعد مزید فیصلے کراں گے، سارے اپوزیشن دل رل کے تے اک ساتھ اپوزیشن کرن گے، رابطے ودھاواں گے تے سانجھی حکمت عملی طے کیتی جاوے گی۔ جے یو آئی سربراہ نے مزید کہیا کہ سینیٹ تے قومی اسمبلی دے اپوزیشن لیڈراں نال گل بات ہوئی اے، اپوزیشن جماعتاں دی آل پارٹیز کانفرنس لئی وی ماحول بننا چاہی دا اے۔

صحافی نے سوال کیتا کہ کیہ پیپلز پارٹی نوں نال ملاؤ گے؟ ایس تے اوہناں کہیا کہ پیپلز پارٹی حکومت وچ اے، اسیں اپوزیشن دی گل کر رہے آں۔ ذرائع مطابق جے یو آئی (ف) تے اپوزیشن اتحاد وچکار اہم ملاقات وچ اپوزیشن جماعتاں دا سانجھا پارلیمانی پارٹی اجلاس وی اج سدّݨ دا فیصلہ کیتا گیا جِس وچ آؤندے ویلے دی سانجھی حکمت عملی تے پارلیمنٹ اندر اپوزیشن دے کردار نوں مزید اثر دار بناون تے گل بات ہووے گی۔ دوجے پاسے ذرائع مطابق پیپلز پارٹی دے اک وڈے وفد نے سپیکر قومی اسمبلی سردار ایاز صادق نال گزری دہاڑے پارلیمنٹ ہاؤس دے صدارتی چیمبر وچ ملاقات کیتی، راجہ پرویز اشرف دی اگواہی وچ وفد وچ نوید قمر، اعجاز جاکھرانی، شیری رحمن، سینیٹر سلیم مانڈوی والا تے ہور شامل سن جبکہ وزیراعظم و وزیر خارجہ اسحاق ڈار، وزیراعظم دے مشیر رانا ثناء اللہ وی ایس موقعے تے موجود سن۔

ذرائع مطابق ملاقات وچ پیپلز پارٹی نے قانون سازی تے ہور پارلیمانی معاملیاں تے اپنے تحفظات سپیکر اگے رکھے تے سیاسی معاملیاں وچ پاسے کیتے جان دیاں گِلیاں دے ڈھیر لا دتے۔ سپیکر قومی اسمبلی نے رولا مکاون لئی پُل دا کردار ادا کرن دا فیصلہ کر لیا، ملاقات دی اندرلی کہانی وی سامنے آ گئی۔ ذرائع مطابق پیپلز پارٹی نے آزاد کشمیر چوناں (انتخابات) دے حوالے نال وی تحفظات توں واقف کیتا تے حکومت نوں خبردار کیتا کہ جے وعدہ خلافی دا لنگھا ایویں ہی چلدا رہیا تاں نال چلنا اوکھا ہو جاوے گا، آزاد کشمیر چوناں وچ دھاندلی دے الزاماں دی تحقیقات کیتی جاوے۔ حکومتی وفد نے مؤقف اختیار کیتا کہ جے پیپلز پارٹی آزاد کشمیر چوناں وچ دھاندلی دے پکے ثبوت دیوے تاں تحقیقات کراون لئی تیار آں، قانون سازی دے معاملے تے وی پیپلز پارٹی دے خدشات دور کرن دی یقین دہانی کروائی گئی۔ اسحاق ڈار نے کہیا کہ اتحادی جماعت دے تحفظات دور کیتے جان گے، ملاقات وچ دونوں جماعتاں نے باہمی رابطہ برقرار رکھن تے اتفاق کیتا۔ سپیکر قومی اسمبلی ایاز صادق نے کہیا کہ اوہ چاہندے نے اتحادی جماعتاں رولا مکاون، ایس مقصد لئی کردار ادا کردے رہن گے۔