قومی اسمبلی تے سینیٹ: نیشنل کمانڈ اتھارٹی ایکٹ وچ ترمیم تے ڈیفنس فورسز ایکٹ 2026 منظور۔
بل وزیرِ دفاع خواجہ آصف نے ضمنی ایجنڈے راہیں پیش کیتے، وفاقی کابینہ نے وی ڈیفنس فورسز ایکٹ دے مسودے دی منظوری دے دتی۔ چیف آف ڈیفنس فورسز دا نواں ادارہ قائم ہون توں بعد ہم آہنگی تے کچھ انتظامی معاملیاں لئی ایہ قانون سازی ضروری سی: وزیرِ قانون۔
اسلام آباد (سٹاف رپورٹر، نامہ نگار، نیوز ایجنسیاں) ڈیفنس فورسز ایکٹ 2026 تے نیشنل کمانڈ اتھارٹی ایکٹ 2010 وچ ترمیم دے بل قومی اسمبلی تے سینیٹ توں کثرتِ رائے نال منظور ہو گئے نے۔ بل وزیرِ دفاع خواجہ آصف نے ضمنی ایجنڈے راہیں پیش کیتے، ایہ ایکٹ 13 نومبر 2025 توں لاگو ہووے گا۔ ایس توں پہلاں وزیراعظم شہباز شریف دی صدارت ہیٹھ وفاقی کابینہ دا اجلاس ہویا جِس وچ ڈیفنس فورسز ایکٹ 2026 دے مسودے تے نیشنل کمانڈ اتھارٹی ایکٹ 2010 وچ ترمیم دی وی منظوری دتی گئی۔
قومی اسمبلی وچ گل بات کردیاں وزیرِ قانون سینیٹر اعظم نذیر تارڑ نے دَسیا کہ پاکستان دفاعی افواج ایکٹ 2026 تے نیشنل کمانڈ اتھارٹی (ترمیمی) بل 2010 تحت چیف آف ڈیفنس فورسز دا دفتر قائم ہو گیا اے تے ایس دے اختیاراں دی وی وضاحت کر دتی گئی اے، ایہناں وچ کسے قسم دا ابہام نہیں۔ قانون سازی دا اختیار وفاقی حکومت کول ہووے گا تے جے ایس وچ کوئی ابہام آئے تاں صدرِ مملکت صدارتی حکم نال اوہنوں دور کرن گے، ایہ سارے قانوناں وچ ہی ہوندا اے۔ ایہ اک خالصتاً تکنیکی قانون اے، کمانڈ اتھارٹی دے 2010 دے قانون وچ چیئرمین جوائنٹ چیفس آف سٹاف کمیٹی دا ذکر سی، اوہدی تھاں تے ہن چیف آف ڈیفنس فورسز دی ترمیم کیتی گئی اے جبکہ اک تھاں کمانڈر آف سٹرٹیجک فورسز شامل کیتا گیا اے۔
