مکہ اتحاد وچ شمولیت تے وکھ وکھ آپشنز وچار ہیٹھ نے: شام۔

شامی وزیرِ خارجہ دیاں شہباز شریف، اسحاق ڈار تے جام کمال نال ملاقاتاں۔

اسلام آباد (نامہ نگار) شام دے وزیرِ خارجہ اسعد حسن الشیبانی نے اسلام آباد دے دورے دوران وزیراعظم شہباز شریف، نائب وزیراعظم اسحاق ڈار تے وزیرِ تجارت جام کمال نال ملاقاتاں کیتیاں، جِس وچ دوہاں ملکاں وچکار تعلقات مزید مضبوط بناون تے اتفاق کیتا گیا۔ شامی وزیرِ خارجہ نے مکہ مشترکہ دفاعی معاہدے دا وی خیر مقدم کیتا تے صحافیاں نال گل بات کردیاں کہیا کہ شامی حکومت پاکستان، ترکیہ تے سعودی عرب وچکار طے پاون والے مکہ معاہدے تحت ممکنہ تعاون یا شمولیت دے حوالے نال اپنے وکھ وکھ آپشنز تے وچار کر رہی اے۔ پاکستان تے شام سفارتی تعلقات نوں سفیراں دی سطح تے اپ گریڈ کرن گے۔ شہباز شریف نے شامی وزیرِ خارجہ تے اوہناں دے وفد دا خیر مقدم کردیاں صدر احمد الشرع لئی نیک خواہشات دا اظہار کیتا تے اوہناں نال اپنی حال ہی وچ ہوئیاں ملاقاتاں دا وی ذکر کیتا۔ اوہناں نے شام دی خودمختاری، اتحاد تے علاقائی سالمیت لئی پاکستان دی پکی حمایت دا اعادہ کیتا۔ وزیراعظم نے پاکستان تے شام وچکار تاریخی تے ڈونگھے تعلقات دا ذکر کردیاں کہیا کہ دوہاں ملکاں دے پرانے دوستانہ تعلقات نوں سیاسی، دفاعی، تجارت، سرمایہ کاری، تعلیم تے انسانی وسائل دی ترقّی سمیت وکھ وکھ شعبیاں وچ عملی تعاون وچ بدلن دی لوڑ اے۔

اوہناں کہیا کہ دوہاں ملکاں وچکار سدھیاں پروازاں دی بحالی نال عوامی رابطیاں وچ وادھا ہووے گا تے وڈی گنتی وچ پاکستان توں شام جان والے زائرین نوں وی سہولت ملے۔ وزیراعظم نے شام دے اتحاد، خودمختاری تے علاقائی سالمیت لئی پاکستان دی حمایت دا اعادہ کردیاں کہیا کہ پاکستان گولان دیاں پہاڑیاں دے معاملے تے شام دے مؤقف دی بھرپور حمایت کرے گا۔ وزیراعظم نے صدر احمد الشرع نوں پاکستان دے سرکاری دورے دی دعوت وی دتی۔ ایس توں پہلاں شامی وزیرِ خارجہ نے نائب وزیراعظم اسحاق ڈار نال ملاقات کیتی، ایس موقعے تے وفداں دی سطح تے مذاکرات وی ہوئے۔ مذاکرات دوران پاکستان تے شام نے دوہاں ملکاں وچکار دیرینہ برادرانہ تعلقات دی تجدید کردیاں باہمی دلچسپی دے وکھ وکھ شعبیاں وچ دوطرفہ تعاون مزید مضبوط بناون تے اتفاق کیتا۔ شامی وزیرِ خارجہ نے مکہ مشترکہ دفاعی معاہدے تے دستخط دا خیر مقدم کردیاں علاقائی امن و استحکام دے فروغ وچ پاکستان دے تعمیری کردار نوں سراہیا۔ اوہناں نے امریکا تے ایران دے تناظر وچ کھچاؤ گھٹان لئی پاکستان dیاں کوشساں دی وی تعریف کیتی۔

دوہاں پاسیاں توں خطے تے ایس توں باہر امن، استحکام تے خوشحالی لئی لگاتار رابطے تے تعاون جاری رکھن دے عزم دا اعادہ کیتا گیا۔ ایس دوران شامی وزیرِ خارجہ نے وفد نال وفاقی وزیرِ تجارت جام کمال خان نال وی ملاقات کیتی، جِس دوران باہمی دلچسپی دے معاملیاں تے گل بات ہوئی۔ جام کمال خان نے کہیا کہ پاکستان شام نال پرانے برادرانہ تعلقات نوں قدر دی نگاہ نال دیکھدا اے۔ دوہاں وزراء نے پاکستان تے شام وچکار دوطرفہ تجارت، سرمایہ کاری تے اقتصادی تعاون نوں مزید ودھاوان تے اتفاق کیتا۔ جام کمال خان نے شامی وزیرِ خارجہ نوں پاکستان دی اقتصادی تے برآمدی طاقت توں واقف کیتا۔ اوہناں کہیا کہ ٹیکسٹائل، دواواں، چمڑے، کھیڈاں دے سامان، آئی ٹی تے زرعی پیداوار وچ تعاون دے وڈے امکانات موجود نے، دوہاں ملکاں دے نجی شعبیاں وچکار رابطیاں تے سانجھے منصوبیاں نوں ودھاوان دی لوڑ اے۔ شامی وزیرِ خارجہ نے شام دی مڑ تعمیر تے ترقّیاتی ترجیحاں توں وزیرِ تجارت نوں واقف کیتا۔ اوہناں کہیا کہ شام وچ رہائش، رئیل سٹیٹ، توانائی، ٹرانسپورٹ، بندرگاہواں، زراعت تے صنعت وچ تعاون دے وڈے امکانات موجود نے۔ اوہناں نے پاکستان-شام سانجھی کاروباری کونسل قائم کرن تے دمشق وچ پاکستان-شام سانجھا سرمایہ کاری فورم کروان دی تجویز دتی۔ اوہناں کہیا کہ شام دی وزارتِ معیشت دا وفد دوطرفہ تعاون دے موقعیاں دا جائزہ لین لئی پاکستان دا دورہ کرے گا۔