کرپشن خلاف وی جلد کریک ڈاؤن کراں گے: مریم۔
منسٹر یا اُپرلے لیول تے کرپشن ثابت ہوئی تاں چھڈاں گی نہیں، دواواں تے ٹیکے چوری ہوندے نے: وزیراعلیٰ۔ ستھرا پنجاب ورکرز نوں 5 تاریخ توں پہلاں تنخواہواں دین دا حکم، آئی پی پی دے پارلیمنٹرینز دی ملاقات۔
لاہور (نیوز ایجنسیاں) مریم نواز شریف نے کہیا اے کہ عوام دی محنت تے خُون پسینے دی کمائی نوں وڈھی (رشوت) تے بدعنوانی دی بھینٹ نہیں چڑھن دتا جاوے گا، نہیں کہندی سبھ ٹھیک اے، کرپشن خلاف وی جلد کریک ڈاؤن کراں گے، عوام دا حکومت تے اعتبار دا رشتہ مڑ بحال ہونا چاہی دا اے، اسیں تہاڈے گریباناں تک پہنچاں گے، ترقّیاتی منصوبیاں وچ شفافیت نوں یقینی بنانا حکومت دی ترجیح اے، منسٹر یا اُپرلے لیول تے اک روپے دی کرپشن ثابت ہوئی تاں اوہنوں نہیں چھڈاں گی، عوام دے پیسے دے اک اک روپے دی راکھی کیتی جاوے گی۔ ایہناں خیالات دا اظہار اوہناں نے گزری دہاڑے لاہور وچ پنجاب انفارمیشن ٹیکنالوجی بورڈ دے سافٹ ویئر ٹیکنالوجی پارک وچ خطاب کردیاں کیتا۔ ایس دوران وزیراعلیٰ پنجاب نال وزیرِ مملکت برائے اوورسیز پاکستانیز محمد عون چودھری، گل اصغر خان تے منزہ حسن تے مشتمل قومی اسمبلی دے ارکان دے وفد نے ملاقات کیتی تے ایس دوران ملکی ترقّی، سیاسی استحکام تے اہم سیاسی معاملیاں تے رل کے اگے ودھن تے اتفاق کیتا گیا۔
دوجے پاسے وزیراعلیٰ پنجاب نے ستھرا پنجاب ورکرز نوں ہر مہینے دی 5 تاریخ توں پہلاں تنخواہواں دی ادائیگی یقینی بناون دا حکم دے دتا، جبکہ تقریب نال خطاب وچ مریم نواز نے مزید کہیا کہ پنجاب وچ وڈے پیمانے تے ترقّیاتی منصوبے چل رہے نے تے اوہناں تے کھرباں روپے خرچ کیتے جا رہے نے، پنجاب دے ہر کامیاب منصوبے پچھے پی آئی ٹی بی دی ٹیکنیکل سپورٹ شامل اے، بہت سال پہلاں ڈیجیٹل انقلاب دے مستقبل نوں سمجھن تے شہباز شریف نوں کریڈٹ دینا ضروری اے، اج دی دنیا وچ اے آئی (AI) توں بغیر کچھ ممکن نہیں۔ وزیراعلیٰ نے کہیا کہ پنجاب اوہ واحد صوبہ اے جِتھے پورا سسٹم آٹو تے آ رہا اے، ای-گورننس، ای-بس، مریم دی دستک تے ہور منصوبے ڈیجیٹل ایکو سسٹم وچ شامل نے، پنجاب وچ ہن روایتی فائلنگ سسٹم نہیں بلکہ ہر فائل ڈیجیٹل سسٹم تے چل رہی اے، ای-فاس دے استعمال نال چھ ارب روپے مہینہ بچائے جا رہے نے۔ اوہناں کہیا کہ پنجاب حکومت تے عوام دا رشتہ دن بہ دن مضبوط ہو رہا اے، لاہور وچ 100 فیصد درستگی لئی سیوریج تے کھرب روپے خرچ کرنے پین گے۔
ہر شہر وچ سیوریج دے آئیڈیل نظام لئی کھرباں روپے درکار نے، کرپشن توں عوام نوں بچانا حکومت تے سسٹم دی ذمہ داری اے، بدقسمتی نال لوک کرپشن دا موقع جانے نہیں دندے، اک کھرب dیاں مفت دواواں دے رہے آں پر دوائیاں تے ٹیکے چوری ہوندے نے، افسوس اے جو سرکاری دفتر وچ آؤندا اے جیب خالی کر کے گھر پہنچدا اے، انشاء اللہ ترائے مہینیاں وچ ایسا نظام لاواں گے جِتھے کسی شہری نوں اپنے کم لئی دفتراں نہ جانا پوے، چیئرمین پی آئی ٹی بی نوں نواں سسٹم بناون دا ٹاسک دے دتا۔ ایدھر استحکام پاکستان پارٹی دے ارکان قومی اسمبلی نے پنجاب وچ جاری ترقّیاتی کماں تے عوامی فلاحی منصوبیاں تے مریم نواز شریف dیاں کوشساں نوں سراہیا۔ ایس توں علاوہ وزیراعلیٰ پنجاب نے اپنی صدارت ہیٹھ خاص اجلاس وچ ستھرا پنجاب پروگرام، شہراں وچ صفائی دی صورتحال تے سیوریج دی نکاسی دے معاملیاں دا وی جائزہ لیا۔
مریم نواز نے ستھرا پنجاب ورکرز نوں ویلے تے ادائیگی نہ کرن والیاں خلاف سخت تے فوری قانونی کارروائی دی ہدایت کیتی۔ اجلاس وچ مریم نواز شریف نے شہراں تے پنڈاں وچ عملے تے ورکرز دی غیر حاضری دی رپورٹ دا سخت نوٹس لیا تے غفلت ورتن والے افسراں تے سخت غصے دا اظہار کیتا تے کہیا کہ ستھرا پنجاب وچ ماڑی کارکردگی تے ایم ڈی ستھرا پنجاب نوں ترائے سال پوسٹنگ نہیں ملے گی۔ مریم نواز شریف نے کہیا کہ ستھرا پنجاب آپریشنز وچ کرپشن تے غفلت ورتن والیاں نوں برداشت نہیں کیتا جاوے گا، خاص سڑکاں تے گندگی نال بھرے ویسٹ انکلیوژر افسوسناک نے۔ ایس توں علاوہ وزیراعلیٰ پنجاب مریم نواز نے راشد منہاس دے 55ویں یومِ شہادت تے جاری اپنے خاص پیغام وچ کہیا اے کہ وڈیاں قوماں اپنے ہیروئاں نوں کبھی نہیں بھُلدیاں، قوم ایس وڈے قومی ہیرو نوں عقیدت تے احترام نال سلام پیش کردی اے۔
