پنجاب: 15 دسمبر توں 15 جنوری تک بلدیاتی الیکشن کراون تے اتفاق۔
انتخابات آئینی منگ: چیف الیکشن کمشنر، حکومت مرحلہ وار کرواوݨا چاہندی اے: چیف سیکرٹری۔
اسلام آباد چیف الیکشن کمشنر سکندر سلطان راجہ دی صدارت ہیٹھ صوبہ پنجاب وچ بلدیاتی انتخابات کرواوݨ دی تاریخ مقرر کرن حوالے نال گزری دہاڑے اجلاس ہویا، اجلاس وچ ممبران الیکشن کمیشن نثار احمد دُرانی، شاہ محمد جتوئی، بابر حسن بھروانہ تے جسٹس (ر) اکرام اللہ شریک ہوئے۔ پنجاب حکومت ولوں چار رکنی کابینہ کمیٹی صوبائی وزیر لوکل گورنمنٹ ذیشان رفیق دی اگواہی وچ شریک ہوئی، جِس وچ وزیر مائنز اینڈ منرل سردار شیر علی گورچانی، وزیر زراعت عاشق حسین شاہ تے وزیر تعلیم رانا سکندر حیات شامل سن۔ میٹنگ وچ چیف سیکرٹری پنجاب، سپیشل سیکرٹری لوکل گورنمنٹ، سیکرٹری الیکشن کمیشن تے ہور افسراں نے وی شرکت کیتی۔ چیف الیکشن کمشنر نے کہیا کہ آئین تحت بلدیاتی انتخابات کرواوݨ آئینی منگ اے تے بلدیاتی حکومتاں دی میعاد مکݨ دے 120 دناں اندر الیکشن کمیشن بلدیاتی انتخابات کرواوݨ دا پابند اے۔
پنجاب مشاورت کمیٹی دے کنوینر صوبائی وزیر لوکل گورنمنٹ ذیشان رفیق نے الیکشن کمیشن نوں بریف کیتا کہ وزیراعلیٰ پنجاب صوبے وچ بلدیاتی انتخابات کرواوݨ لئی پرعزم نے، صوبائی حکومت نے بلدیاتی انتخابات دا پراسس شروع کرنا اے تے وسلیاں (Resources) دی ٹھیک فراہمی لئی وقت چاہی دا اے، ایس لئی بلدیاتی انتخابات 15 دسمبر 2026 توں 15 جنوری 2027 نوں کرواوݨ زیادہ موزوں اے کیونکہ ایس دوران بالاں دے امتحان وی ہو چکے ہوݨ گے تے صوبے وچ دُھند (Fog) دا مسئلہ وی نہیں ہووے گا۔ چیف سیکرٹری نے الیکشن کمیشن نوں بریف کیتا کہ صوبائی حکومت اتلے دتے گئے دناں اندر صوبے وچ مرحلہ وار انتخابات کرواوݨ چاہندی اے، الیکشن کمیشن نے صوبائی حکومت دی تجویز نال اصولی طور تے اتفاق کیتا تے کہیا کہ صوبائی حکومت جلد توں جلد پلان مشاورت لئی پیش کرے۔ چیف الیکشن کمشنر نے پنجاب وچ بلدیاتی انتخابات کرواوݨ دے سلسلے وچ پنجاب کابینہ دی کمیٹی دیاں تجاویز نوں سراہیا۔
