یورپی یونین، بیلی دیساں نال تجارتی سانجھ ودھاوݨ تے وچار کر رہی اے۔

اسحاق ڈار دی صدارت ہیٹھ اجلاس، انتونیو گوتریس تے برازیلین وزیرِ خارجہ نال رابطہ۔

اسلام آباد (وقائع نگار، مانیٹرنگ ڈیسک) نائب وزیراعظم اسحاق ڈار دی صدارت ہیٹھ بیلی دیساں بالخصوص یورپی یونین نال تجارتی تے اقتصادی رابطیاں نوں ودھاوان حوالے نال ستواں اجلاس ہویا۔ سارے متعلقہ افسراں نوں ہدایت کیتی گئی کہ پاکستان دی تجارتی تے برآمدی کارکردگی وچ وادھے نوں ترجیح دتی جاوے۔ ایس موقعے تے مارکیٹ تک پہنچ، برآمدی کارکردگی وچ وادھا تے متعلقہ دھراں وچکار موثر رابطہ کاری نوں مزید بہتر بناون دے معاملیاں تے گل بات ہوئی۔ نائب وزیراعظم نے جی ایس پی پلس (GSP Plus) فریم ورک تحت کیتے گئے وعدیاں تے کنونشنز تے عمل درآمد نوں یقینی بناوان دی اہمیت تے وی زور دتا۔ اوہناں نے سارے متعلقہ افسراں نوں ہدایت کیتی کہ پاکستان دی تجارتی تے برآمدی کارکردگی نوں ودھاوان لئی طے شدہ قدماں تے ویلے سر عمل درآمد یقینی بنایا جاوے۔

نائب وزیراعظم اسحاق ڈار نے اقوامِ متحدہ دے سیکرٹری جنرل انتونیو گوتریس نال ٹیلی فون تے رابطہ کیتا، جِس وچ باہمی دلچسپی دے معاملیاں تے گل بات کیتی گئی۔ اسحاق ڈار نے اقوامِ متحدہ دے مرکزی کردار لئی پاکستان دی بھرپور حمایت دا اعادہ کردیاں انتونیو گوتریس دی قیادت نوں سراہیا۔ دوہاں آگوآں نے نیڑے دا رابطہ برقرار رکھن تے اتفاق کیتا۔ دوجے پاسے برازیل دے وزیرِ خارجہ سفیر ماؤرو ویئرا نے نائب وزیراعظم اسحاق ڈار نال ٹیلی فون تے رابطہ کیتا۔ برازیل دے وزیرِ خارجہ نے امریکا تے ایران دے تناظر وچ پاکستان دے تعمیری کردار تے ثالثی دیاں کوشساں نوں سراہیا تے عالمی امن لئی سفارت کاری دی اہمیت تے زور دتا۔

اوہناں نے پاکستان ولوں مکہ مشترکہ دفاعی معاہدے تے دستخط کرن تے مبارکباد وی پیش کیتی۔ دوہاں وزراء خارجہ نے اقوامِ متحدہ تے ہور عالمی فورمز تے اعلیٰ سطح دے رابطے جاری رکھن تے اتفاق کیتا۔ ایس توں علاوہ نائب وزیراعظم نال سوئٹزرلینڈ وچ پاکستان دے سفیر مرغوب بٹ نے وی ملاقات کیتی، جِس وچ پاکستان تے سوئٹزرلینڈ دے تعلقات، تجارت، سرمایہ کاری تے کاروباری رابطے ودھاوان دے معاملیاں تے گل بات ہوئی۔ اسحاق ڈار نے دوہاں ملکاں وچکار بزنس ٹو بزنس رابطے مزید مضبوط کرن دی لوڑ تے زور دتا۔