سوال دا جواب چار اجلاسوں توں نہ ملن تے سپیکر برہم، افسران ایوان وچ طلب کر لئے گئے۔
سوال دا جواب نہ ملن تے سپیکر برہم، قومی اسمبلی دی کارروائی
اسلام آباد (نامہ نگار) قومی اسمبلی وچ وقفہ سوالات دے دوران وزارت بین الصوبائی رابطہ نال متعلق سوال دا جواب مسلسل چار اجلاسوں توں نہ ملن تے سپیکر ایاز صادق نے سخت برہمی دا اظہار کیتا۔
انہوں نے آکھیا کہ جے سنجیدگی نال بزنس نہیں لینا تاں پھر وقفہ سوالات نہیں کردے۔ سپیکر نے وفاقی وزیر پارلیمانی امور ڈاکٹر طارق فضل نوں ہدایت کیتی کہ وزارت دے سیکرٹری، ایڈیشنل سیکرٹری، جوائنٹ سیکرٹری تے سیکشن افسر نوں فوری ایوان وچ طلب کیتا جائے تے کارروائی مکمل ہون تک اتھے موجود رہن دی ہدایت کیتی جائے۔ انہوں نے خبردار کیتا کہ آئندہ جواب نہ آیا تاں وزیر پارلیمانی امور تے متعلقہ افسر دے خلاف تحریک استحقاق لائی جائے گی۔
قومی اسمبلی وچ وقفہ سوالات دے دوران وفاقی وزیر عون چودھری نے دسیا کہ بیرون ملک مقیم پاکستانیوں دی زمین تے جائیداد نال متعلق تنازعات دے بروقت حل لئی اسلام آباد دے بعد پنجاب دے تمام 36 اضلاع وچ اوورسیز کورٹس قائم کر دتیاں گئیاں نیں۔ خیبر پختونخوا وچ اوورسیز کورٹس دے قیام دا بل صوبائی حکومت کول زیر غور اے جدوں کہ سندھ حکومت نال وی خصوصی عدالتاں دے قیام لئی رابطہ کیتا گیا اے۔ سپیکر نے ایس معاملے تے تحریری رپورٹ طلب کر لئی۔
وفاقی وزیر ڈاکٹر طارق فضل نے دسیا کہ سعودی عرب، متحدہ عرب امارات، قطر، کویت، بحرین تے عمان سمیت خلیجی ملکاں توں یکم مارچ 2026 تک 21,951 پاکستانی ڈی پورٹ کیتے گئے۔ انہوں نے آکھیا کہ ڈی پورٹیشن دیاں وجوہات وچ اقامہ تے ویزا قوانین دی خلاف ورزی، غیر قانونی رہائش، منشیات، مفروری تے امیگریشن قوانین دی خلاف ورزیاں شامل نیں، جدوں کہ تفصیلی لسٹ ایوان دے ریکارڈ وچ جمع کرا دتی گئی اے۔
وفاقی وزیر نے دسیا کہ اسلام آباد وچ 300 توں زائد نجی تے دوجے تعلیمی اداریاں نوں سپریم کورٹ دے احکامات دے مطابق ریگولیٹ کیتا جا رہا اے۔ انہوں نے آکھیا کہ تعلیمی اداریاں دے مسئلے دے مستقل حل تے شہر وچ ٹریفک تے رہائشی علاقیاں تے دباؤ گھٹ کرن لئی سی ڈی اے سیکٹرز توں باہر جامع ایجوکیشن سٹی قائم کرن دی منصوبہ بندی کر رہا اے۔
وزیر مذہبی امور سردار محمد یوسف نے دسیا کہ حجاج کرام دی سفری ذمہ داریاں معمول دے مطابق پی آئی اے تے سعودی ایئر لائن دے درمیان پچاس پچاس فی صد تقسیم کیتیاں جاندیاں نیں، جدوں کہ دوجیاں نجی ایئر لائنز دی گنجائش محدود اے۔
