ہائیکورٹ بھونگ انٹرچینج لئی فنڈز جاری نہ ہون تے برہم

یہ آخری مہلت اے، فنڈز نہ دیتے تے سیکرٹری نوں بلا کے چارج فریم کراں گے :جسٹس آصف پراجیکٹ نوں مکمل کرن لئی اک سال دا ویلا دتا گیا سی، 3 ورھے لنگھ چکے نے:ریمارکس

اسلام آباد (رضوان قاضی) اسلام آباد ہائیکورٹ دے جسٹس محمد آصف نے سپریم کورٹ دے فیصلے دے مطابق ملتان سکھر موٹروے تے بھونگ انٹرچینج بناؤن دی درخواست تے پلاننگ ڈویژن نوں فنڈز جاری کرن لئی آخری مہلت دے دتی اے تے پراجیکٹ لئی فنڈز جاری نہ ہون تے برہمی دا اظہار کردیاں لا افسر نوں کیہا کہ سیکرٹری صاحب نوں جا کے دس دیو آخری مہلت دے رہے آں، جے ہن وی فنڈز جاری نہ کیتے تے پھر سیکرٹری نوں بلا کے اوہناں تے چارج فریم کراں گے۔ این ایچ اے دے وکیل نے کیہا کہ ایہ پراجیکٹ پی ایس ڈی پی دا اے، اساں عمل درآمد کروانا اے، نو سو ملین آؤندے سال لئی منگے سن جیہڑے اجے تک نہیں ملے۔ پلاننگ والے دس سکدے نے فنڈز کیوں نہیں دے رہے۔ لا افسر نے کیہا کہ اجے سیکرٹری نوں نہ بلاؤ، میں ہدایتاں لے لینی آں۔ جسٹس محمد آصف نے لا افسر نوں کیہا کہ پراجیکٹ نوں مکمل کرن لئی اک سال دا ویلا دتا گیا سی، تن سال لنگھ گئے نے۔ وکیل درخواست گزار نے وار وار استدعا کیتی کہ کمیشن بنا کے انسپکشن کروا لوو۔ عدالت نے سماعت 8 ستمبر تک ملتوی کر دتی۔