برآمدات وادھن لئی قیمتی پتھراں دی برانڈنگ ضروری: ہارون اختر

اسلام آباد (وقائع نگار) وزیراعظم دے مشیر برائے صنعت و پیداوار (وفاقی وزیر) ہارون اختر خان دی صدارت ہیٹھ پاکستان دے قیمتی پتھراں دے شعبے دی ترقی تے وادھے بارے اسٹیئرنگ کمیٹی دا اجلاس ہویا۔۔۔
اجلاس وچ ملک دے قیمتی پتھراں دے شعبے دی ترقی، سرمایہ کاری دے وادھے، ویلیو ایڈیشن وچ وادھے، عالمی منڈیاں تک پہنچ سکھالی بناؤن تے برآمدات وادھن لئی وکھ وکھ قدماں دا جائزہ لیا گیا۔ اجلاس توں خطاب کردیاں ہارون اختر خان نے کیہا کہ پاکستانی قیمتی پتھراں دی مؤثر مارکیٹنگ تے برانڈنگ ویلے دی اہم لوڑ اے تاکہ برآمدات وچ وادھا کیتا جا سکے تے عالمی منڈیاں وچ تکڑے ‘میڈ ان پاکستان’ برانڈز متعارف کروائے جا سکن۔ کمیٹی نوں مزید دسیا گیا کہ کوئٹہ وچ قیمتی پتھراں تے زیورات دے شعبے لئی اک خاص تربیتی مرکز چھیتی قائم کیتا جاوے گا، اس توں علاوہ گلگت بلتستان، آزاد جموں تے کشمیر تے اسلام آباد وچ قیمتی پتھراں دے شعبے لئی سینٹرز آف ایکسیلنس قائم کیتے جان گے۔