سرکاری ملازماں دے سوشل میڈیا اکاؤنٹاں دی وی نگرانی شروع

عہدہ چھڈن والا افسر سارے سرکاری سوشل میڈیا اکاؤنٹاں دا کنٹرول چھڈن دا پابند

اسلام آباد (مانیٹرنگ ڈیسک) حکومت نے سرکاری ملازماں دے ذاتی سوشل میڈیا اکاؤنٹاں دی وی کڑی نگرانی شروع کر دتی اے جد کہ نویں سول سرونٹس کنڈکٹ رولز 2026 تے سختی نال عملدرآمد کرن دا فیصلہ کیتا گیا اے، سرکاری افسراں دے ذاتی سوشل میڈیا اکاؤنٹ وی نویں رولز دے دائرے وچ آ گئے نے۔ سرکاری ذرائع مطابق حکومت مخالف سرگرمیاں یا بیانیے دی تشہیر وچ ملوث سرکاری ملازم ریڈار تے آ گئے نے، گمنام یا فرضی اکاؤنٹ توں حکومت یا اداریاں نوں بدنام کرن تے وی کارروائی ہوئے گی، کوئی افسر ذاتی سوشل میڈیا تے سرکاری کم نوں تشہیر لئی وی ورت نہیں سکدا، سرکاری اکاؤنٹاں نوں وی ذاتی تشہیر، برانڈنگ تے نمائش لئی ورتن تے پابندی لا دتی گئی اے۔

کسے وی افسر توں سرکاری یا نجی سوشل میڈیا اکاؤنٹاں دی تفصیل منگی جا سکدی اے، سرکاری سوشل میڈیا اکاؤنٹ وی پہلے توں لکھی اجازت نال بنائے تے چلائے جان گے، سرکاری اکاؤنٹاں تے صرف تصدیق شدہ سرکاری معلومات تے سرگرمیاں ہی نشر ہون گیاں، عہدہ چھڈن والا افسر سارے سرکاری سوشل میڈیا اکاؤنٹاں دا کنٹرول چھڈن دا پابند ہوئے گا، عہدہ چھڈن والا افسر لاگ ان، آرکائیو ڈیٹا تے انتظامی رسائی آؤن والے افسر (جانشین) نوں دے کے جاوے گا، حکومتی پالیسی یا موقف دے خلاف رائے یا معلومات نشر کرن تے مکمل پابندی ہوئے گی، قواعد دے دائرے وچ ٹی وی، ریڈیو، پوڈ کاسٹ، بلاگ، ویڈیوز، ویب سائٹ تے سوشل میڈیا شامل نے، رولز دی خلاف ورزی تے سرکاری افسراں خلاف محکمانہ کارروائی ہوئے گی۔