بلوچستان وچ سرکاری اسلحہ چوری، کالعدم تنظیماں نوں وکن دا انکشاف

کوئٹہ (آئی این پی) بلوچستان وچ سرکاری اسلحے دی وڈے پُدھر (پیمانے) تے چوری تے کالعدم تنظیماں نوں وکن دا انکشاف ہویا اے، پرانا لیویز تے موجودہ پولیس افسر سمیت تن بندیاں نوں پھڑ لیا گیا اے۔۔۔

ذرائع مطابق ایہہ معاملہ ایس ورھے مئی وچ اوہدوں سامھنے آیا جَدوں کوئٹہ دے علاقے بلیلی وچ محکمہ ایکسائز نے معمول دی چیکنگ دے دوران اک گڈی توں اسلحہ برآمد کیتا تے بعدوں ایہہ کیس ہور تفتیش لئی کاؤنٹر ٹیررازم ڈیپارٹمنٹ (سی ٹی ڈی) دے حوالے کیتا گیا۔ سی ٹی ڈی نے بعد وچ کوئٹہ دے علاقے کلی نوحصار وچ اک گھر توں ہور اسلحہ برآمد کر کے دو ملزماں نوں پھڑ لیا۔ ایہناں وچوں اک ملزم روشن خان دی ڈیوٹی لیویز دے اسلحہ خانے وچ سی، بعد وچ لیویز اسلحہ خانے دے انچارج عبدالحکیم نوں وی پھڑ کے تفتیش وچ شامل کیتا گیا۔

ایف آئی آر مطابق سی ٹی ڈی نوں مخبر نے فون تے دَسّیا کہ روشن خان جو کہ لیویز ملازم اے تے اپنے دوجے ساتھیاں محمد شفیق، حنیف بڑیچ نال مل کے کالعدم تنظیماں نوں دہشت گردی لئی گولہ بارود تے اسلحہ دیندا اے، اوہدے گھر دی تلاشی تے اَٹھ بوریاں تے اک کاٹھ (لکڑی) دے بکس توں بھاری اسلحہ لبھیا۔ ایہدے وچ چار سب مشین گناں (ایس ایم جیز)، چھ چینی ساختہ رائفلان، تن لائٹ مشین گناں (ایل ایم جی)، پنج تھری ناٹ تھری رائفلان، اک جی تھری رائفل، بارہ تے بائیس بور دیاں دو رائفلان، پنج ہزار توں بہتیائں گولیاں تے درجناں میگزین شامل سن۔ ایہدے توں وکھ 16 راکٹ گولے، اوہناں نوں چلاؤن والے دو لانچر، 18 فیوز تے دَس دستی بم وی لبھے۔