سکیورٹی فورسز دے پختونخوا تے بلوچستان وِچ مشترکہ آپریشنز ، 49 دہشت گرد ہلاک

خفیہ اطلاعات تے کارروائیاں دوران پختونخوا وِچ 12، بلوچستان وِچ 37 شدت پسند ہلاک کیتے گئے :آئی ایس پی آر، وڈی مقدار وِچ دھماکہ خیز مواد تے اسلحہ برآمد، صدرِ مملکت، وزیراعظم، وفاقی وزیرِ داخلہ دا فورسز نوں خراجِ تحسین

راولپنڈی، اسلام آباد خیبر پختونخوا تے بلوچستان دے مختلف ضلعیاں وِچ سکیورٹی فورسز دے مشترکہ انٹیلی جنس بیسڈ آپریشنز دوران بھارتی سرپرستی وِچ سرگرم فتنہ الہندوستان نال تعلق رکھن والے 49 دہشت گرداں نوں ہلاک کر دِتا گیا۔ پاک فوج دے شعبہ تعلقاتِ عامہ (آئی ایس پی آر) ولوں جاری بیان وِچ کہیا گیا اے کہ سکیورٹی فورسز نے دہشت گرداں خلاف پچھلے کچھ دناں دوران پولیس نال مل کے خفیہ اطلاعات دی بنیاد تے پختونخوا وِچ بنوں، شمالی وزیرستان، اورکزئی تے ضلع خیبر وِچ کئی مشترکہ کارروائیاں کیتیاں جیہدے وِچ 12 شدت پسند ہلاک کیتے گئے جبکہ بلوچستان وِچ مستونگ، مچھ، خضدار تے پنجگور دے ضلعیاں وِچ 10 کارروائیاں دوران 37 شدت پسند ہلاک کیتے گئے، اس دوران امن و استحکام نوں نقصان پہنچاؤن دیاں کوشساں وی ناکام بنائیاں گئیاں نیں۔ آئی ایس پی آر مطابق ایہناں کارروائیاں وِچ وڈی مقدار وِچ دھماکہ خیز مواد نال بھرے ڈرم، دیسی ساختہ بمباں دے ریموٹ کنٹرول، اسلحہ، گولہ بارود تے موٹر سائیکلاں وی برآمد کر لئیاں گئیاں۔ برآمد اسلحے تے دھماکہ خیز مواد نوں مزید تخریب کاری لئی استعمال کیتا جانا سی۔

ذرائع مطابق سکیورٹی فورسز نے کارروائیاں دوران دہشت گرداں دے ٹھکاݨیاں نوں وی نشانہ بنایا۔ مزید برآں سکیورٹی فورسز ولوں علاقے وِچ کلیئرنس آپریشن جاری اے جبکہ دہشت گرداں دے ممکنہ سہولت کاراں تے دوجے ساتھیاں دی بھال وی کیتی جا رہی اے۔ ایدھر صدرِ مملکت آصف علی زرداری، وزیراعظم شہباز شریف، وفاقی وزیرِ داخلہ محسن نقوی نے پختونخوا تے بلوچستان وِچ دہشت گرداں خلاف کامیاب کارروائیاں تے اپنے الگ الگ بیاناں وِچ سکیورٹی فورسز نوں خراجِ تحسین پیش کیتا اے۔ صدرِ مملکت نے کہیا کہ بیرونی پشت پناہی وِچ سرگرم دہشت گرد عناصر ملک دے امن و استحکام نوں نقصان پہنچاؤن وِچ کدی بھی کامیاب نہیں ہوݨ گے، دہشت گردی دے مکمل خاتمے تک کارروائیاں بھرپور انداز وِچ جاری رہیں گی۔ وزیراعظم شہباز شریف نے کہیا اے کہ ایہہ کامیاب آپریشن ساڈی سکیورٹی فورسز تے پولیس دی پیشہ ورانہ مہارت دا مظہر نیں، حکومتِ پاکستان ملک توں دہشت گردی دے مکمل خاتمے لئی پرعزم اے۔ وزیرِ داخلہ محسن نقوی نے کہیا کہ دہشت گرداں دے مذموم عزائم ناکام بناؤن والے سکیورٹی فورسز دے بہادر سپوتاں تے فخر اے، قوم دہشت گردی خلاف جنگ وِچ فورسز دے شانہ بشانہ کھڑی اے، فتنہ الہندوستان دے دہشت گرداں نوں کِتے وی لُکن دی جگہ نہیں ملے گی۔