کانگو وفد دی ایئر چیف نال ملاقات، دفاعی تعاون ودھاؤن تے اتفاق

علاقائی سلامتی، تربیت، پیشہ ورانہ مہارتاں تے باہمی رابطیاں دے فروغ تے تبادلۂ خیال، کانگو فضائیہ دی جدید خطوط تے تشکیل، پاک فضائیہ دے تجربیاں توں استفادہ دی خواہش

اسلام آباد (خصوصی نیوز رپورٹر) جمہوریہ کانگو دے اعلیٰ سطح دفاعی وفد نے چیف آف ڈیفنس فورسز لیفٹیننٹ جنرل بانزا مویلَمبو جولز دی سربراہی وِچ ایئر ہیڈکوارٹرز اسلام آباد وِچ سربراہ پاک فضائیہ ایئر چیف مارشل ظہیر احمد بابر سدھو نال ملاقات کیتی، ملاقات دوران باہمی دلچسپی دے امور، علاقائی سلامتی دی صورتحال، دفاعی تعاون نوں مزید فروغ دیݨ دے امکانات تے تبادلۂ خیال کیتا گیا۔ ترجمان پاک فضائیہ مطابق ایئر چیف نے پاکستان تے جمہوریہ کانگو درمیان دیرینہ دوستانہ تعلقات نوں اجاگر کردے ہوئے دونوں ملکاں مابین دفاعی تعاون نوں مزید وسعت دیݨ تے اتفاق کیتا۔ ایہناں نے مسلح افواج درمیان باہمی رابطے، تربیت تے پیشہ ورانہ مہارتاں دے تبادلے سمیت مختلف شعبیاں وِچ تعاون دے فروغ لئی پاک فضائیہ دے عزم دا اعادہ کیتا۔

ایئر چیف نے معزز مہمان نوں پاک فضائیہ دی مقامی سطح تے حاصل کیتیاں دفاعی صلاحیتاں تے خود انحصاری دے حصول لئی جاری کوشساں توں وی آگاہ کیتا۔ ملاقات دوران معزز مہمان نے پاک فضائیہ دی پیشہ ورانہ صلاحیت، اعلیٰ آپریشنل تیاری تے تربیت دے بلند معیار نوں سراہیا۔ ایہناں نے پاک فضائیہ دی مقامی سطح تے دفاعی صلاحیتاں دے حصول وِچ خصوصی دلچسپی دا اظہار کردے ہوئے خود انحصاری تے مقامی دفاعی پیداوار دے میدان وِچ پاک فضائیہ دی نمایاں پیش رفت دا اعتراف کیتا، معزز مہمان نے جمہوریہ کانگو دی فضائیہ دی ازسرنو تشکیل تے ایہنوں جدید خطوط تے استوار کرن دے عزم دا اظہار کردے ہوئے پاک فضائیہ دے وسیع پیشہ ورانہ تجربے تے مہارت توں استفادہ کرن دی خواہش دا اعادہ کیتا۔