پختونخوا اسمبلی: بانی دی صحت دے معاملے اُتے حکومتی تے اپوزیشن ارکان وچ تلخی، ہنگامہ
شاور (اے پی پی، مانیٹرنگ ڈیسک) خیبرپختونخوا اسمبلی دے اجلاس وچ بانی پی ٹی آئی دی صحت تے انہاں نال رکھے جان والے سلوک دے معاملے اُتے حکومتی تے اپوزیشن ارکان وچ شدید تلخ کلامی تے ہنگامہ آرائی ہوئی۔
حکومتی رکن اسمبلی سجاد بارکوال نے آکھیا کہ سیاسی مخالفاں نے نارمل چیک اَپ توں بعد بانی پی ٹی آئی نوں دوبارہ اڈیالہ جیل منتقل کر دِتا۔ ایس دوران مسلم لیگ (ن) دی رکن ثوبیہ شاہد نے کورم دی نشاندہی کر دِتی، جس اُتے حکومتی ارکان مشتعل ہو گئے تے اپنی نشستاں اُتے کھڑے ہو گئے۔
ایس توں بعد ایوان وچ شدید شور شرابا شروع ہو گیا تے ماحول کشیدہ ہو گیا، جدویں دونوں پاسیاں دے ارکان دے احتجاج دے باعث ایوان مچھلی منڈی دا منظر پیش کرن لگ پیا۔ ڈپٹی سپیکر ثریا بی بی نے کئی واری ارکان نوں خاموش رہن تے اپنی نشستاں اُتے بیٹھن دی ہدایت کیتی، تاہم شور شرابا جاری رہیا۔
اے این پی دے پارلیمانی لیڈر ارباب عثمان نے آکھیا کہ افسوس دی گل اے کہ حکومتی بینچ اکثر خالی پئے رہندے نیں، ایوان دے تقدس دا احترام کیتا جانا چاہیدا اے۔
دو منٹ دے وقفے توں بعد اجلاس دوبارہ شروع ہویا تے مطلوبہ تعداد وچ ارکان ایوان وچ موجود سن، تاہم ثوبیہ شاہد ولوں شور شرابا تے کارروائی وچ خلل پاون دا سلسلہ جاری رہیا۔
ایس اُتے ڈپٹی سپیکر نے برہمی دا اظہار کردیاں آکھیا کہ تسی کسے مہمان خانے وچ نہیں بلکہ اسمبلی وچ کھڑے او، مہربانی کرکے اپنی نشست اُتے بیٹھ جاؤ۔
شور شرابا کرن اُتے خیبرپختونخوا اسمبلی وچ مسلم لیگ (ن) دی رکن ثوبیہ شاہد اُتے دو ہفتیاں تک اجلاس وچ شرکت دی پابندی عائد کر دِتی گئی۔
