پنجاب اسمبلی: عمران نوں شفا منتقل نہ کرن اُتے اپوزیشن دا احتجاج
نجاب اسمبلی: عمران نوں شفا منتقل نہ کرن اُتے اپوزیشن دا احتجاج
لاہور (سیاسی نمائندہ) پنجاب اسمبلی وچ اپوزیشن نے بانی تحریک انصاف نوں شفا ہسپتال منتقل نہ کیتے جان تے سپریم کورٹ دے احکاما تے عملدرآمد نہ ہون خلاف شدید احتجاج کیتا۔ اپوزیشن لیڈر معین ریاض قریشی نے الزام لایا کہ حکومت نے سپریم کورٹ دے احکاما نوں نظرانداز کرکے کسے دی انا دی تسکین کیتی، جے صورتحال ایس طرح برقرار رہی تاں اپوزیشن جمہوریت تے اسمبلیاں توں باہر نکلن اُتے مجبور ہووے گی۔
سپیکر پنجاب اسمبلی ملک محمد احمد خان دی زیرِ صدارت پنجاب اسمبلی دا اجلاس دو گھنٹے پنج منٹ دی تاخیر نال شروع ہویا۔ اجلاس دے آغاز اُتے پوائنٹ آف آرڈر اُتے گل کردیاں اپوزیشن لیڈر معین ریاض قریشی نے آکھیا کہ سابق وزیراعظم نوں گزشتہ اَٹھ مہینیاں توں قیدِ تنہائی وچ رکھیا گیا اے تے انہاں دے علاج لئی سپریم کورٹ دے حکم اُتے عملدرآمد نہ کرکے حکومت نے عدلیہ دا مذاق اڑایا اے۔ عدلیہ دی ذمہ داری اے کہ اوہ اپنے احکاما اُتے عملدرآمد یقینی بنائے۔
اپوزیشن لیڈر دی تقریر دوران حکومتی ارکان ولوں نوک جھونک دے باعث ایوان دا ماحول کشیدہ ہو گیا۔
ایس اُتے سپیکر ملک محمد احمد خان نے معاملہ سنبھال لیا تے حکومتی ارکان نوں خبردار کیتا کہ ایس طرح دے رویے دی ہرگز اجازت نہیں دِتی جاوے گی۔ سپیکر نے آکھیا کہ جے کسے نے دوبارہ نازیبا الفاظ استعمال کیتے تاں اوہنوں اجلاس توں باہر جانا پئے گا۔
اپوزیشن نے ایجنڈا معطل کرکے بانی تحریک انصاف دی صحت دے معاملے اُتے بحث دی اجازت منگی۔ اپوزیشن دے مطالبے اُتے سپیکر پنجاب اسمبلی نے یقین دہانی کرائی کہ وقفۂ سوالات توں بعد اپوزیشن نوں ایس معاملے اُتے گل کرن دا موقع دِتا جاوے گا۔
سپیکر نے آکھیا کہ اپوزیشن اپنے رہنماؤں نوں جمہوریت دا چیمپئن قرار دیندی اے، جدویں حکومت انہاں نوں 9 مئی دے واقعات دا ملزم سمجھدی اے۔
فوری بحث دی اجازت نہ ملن اُتے اپوزیشن ارکان نے ایوان وچ احتجاج کیتا تے کورم دی نشاندہی کرکے کارروائی دا بائیکاٹ کر دِتا، تاہم حکومت کورم پورا کرن وچ کامیاب رہی۔
بعد وچ اپوزیشن ارکان ایوان توں باہر نکل آئے تے پنجاب اسمبلی دیاں سیڑھیاں اُتے احتجاج کیتا۔ کورم مکمل نہ ہون دے باعث پنجاب اسمبلی دا اجلاس پیر دی سہ پہر دو وجے تک ملتوی کر دِتا گیا۔
