پنجاب حقیقی طور اُتے ترقی تے ٹیکنالوجی دے دور وچ داخل ہو چکیا اے: مریم نواز
ہسپتالاں تے تعلیمی اداریاں توں دوجے صوبیاں دے لوک وی فائدہ چک رہے نیں، پنجاب سروسز تے ٹیکنالوجی وچ لیڈ کرے گا: مریم نواز
لاہور (سٹاف رپورٹر، آئی این پی) وزیراعلیٰ پنجاب مریم نواز شریف نے آکھیا اے کہ پنجاب حقیقی طور اُتے ترقی تے ٹیکنالوجی دے دور وچ داخل ہو چکیا اے۔ پنجاب دے ہسپتالاں تے تعلیمی اداریاں توں دوجے صوبیاں دے عوام وی فائدہ چک رہے نیں۔ پنجاب ای بز تے مریم دی دستک پورٹل دی بدولت پنجاب سروسز تے ٹیکنالوجی دے شعبے وچ لیڈ کرے گا۔
ایہ گل اُنہاں گزشتہ روز لودھراں دے صوبائی اسمبلی ممبراں محمد زبیر خان تے شازیہ حیات نال ملاقات دوران کیتی۔ ملاقات وچ سیاسی معاملات، ترقیاتی منصوبیاں تے ہور امور اُتے تبادلہ خیال کیتا گیا۔ صوبائی اسمبلی ممبراں نے اپنے حلقیاں وچ درپیش عوامی مسائل بارے وزیراعلیٰ نوں آگاہ کیتا تے ملتان وہاڑی روڈ دی تکمیل اُتے خراجِ تحسین پیش کردیاں لودھراں وچ الیکٹرو بس سروس شروع کرن اُتے شکریہ ادا کیتا۔
صوبائی اسمبلی دے ممبراں نے آکھیا کہ شاہدہ اسلام ہسپتال، دنیاپور، کچہری چوک، میلاد چوک تے کہروڑ پکا روٹس اُتے الیکٹرو بس کامیابی تے مقبولیت دے ریکارڈ قائم کر رہی اے۔ وزیراعلیٰ مریم نواز شریف دے صوبے وچ ہیلتھ انیشیٹو عوام دے دلاں وچ گھر کر چکے نیں۔
وزیراعلیٰ مریم نواز شریف نے آکھیا کہ لاہور وچ جناح انسٹیٹیوٹ آف کارڈیالوجی تے ضلعیاں وچ کیتھ لیبز مکمل طور اُتے فعال نیں۔ اُنہاں دا کہنا سی کہ پنجاب ای بز تے مریم دی دستک پورٹل دی بدولت پنجاب سروسز تے ٹیکنالوجی وچ لیڈ کرے گا۔ اُنہاں صوبائی اسمبلی ممبراں نوں ہدایت کیتی کہ اوہ عوامی مسائل دے حل لئی مسلسل متحرک تے کوشاں رہن۔
دریں اثنا مریم نواز شریف دے حکم اُتے صوبائی معاون خصوصی وزیراعلیٰ انسپکشن ٹیم شعیب مرزا، پی ڈی ایم حکام دے نال لیہ وچ دریائی کٹاؤ توں متاثرہ علاقے سمرا نشیب پہنچ گئے۔ ریلیف تے ریسکیو لئی ضروری مشینری وی منگوا لئی گئی۔
شعیب مرزا نے متاثرہ علاقوں دا تفصیلی معائنہ کیتا تے متاثرہ لوکاں نال ملاقات کرکے اوہناں دے مسائل بارے معلومات حاصل کیتیاں۔ نقصانات دا وی جائزہ لیا گیا۔ وزیراعلیٰ دی ہدایت اُتے متاثرین لئی کھانے تے ہور ضروری اشیا دی فراہمی دا انتظام کیتا گیا۔
مریم نواز شریف نے موضع سمرا نشیب نوں مستقبل وچ دریائی کٹاؤ توں محفوظ رکھن لئی ضروری اقدامات بارے تجاویز پیش کرن دا حکم دِتا۔ ڈی سی لیہ آصف علی ڈوگر تے ضلعی انتظامیہ دے ہور افسران وی متاثرین دی بحالی تے ریسکیو کارروائیاں دی نگرانی لئی موجود سن۔
وزیراعلیٰ دی ہدایت اُتے نقصانات دا جائزہ لین لئی خصوصی کمیٹی وی تشکیل دے دِتی گئی اے، جو متاثرہ کاشتکاراں دی زمین، گھراں تے ہور نقصانات دا تعین کرکے رپورٹ پیش کرے گی۔
