لانگ مارچ 27 ستمبر نوں ای ہووے گا، تاریخ نہیں بدلی: سہیل آفریدی

نگ مارچ 27 ستمبر نوں ای ہووے گا، تاریخ وچ کوئی ردوبدل نہیں: سہیل آفرید

بونیر (این این آئی) وزیراعلیٰ خیبرپختونخوا سہیل آفریدی نے دوٹوک الفاظ وچ آکھیا اے کہ لانگ مارچ 27 ستمبر نوں ای ہووے گا تے تاریخ وچ کوئی ردوبدل نہیں کیتا گیا۔

میڈیا نال گل بات کردیاں وزیراعلیٰ نے آکھیا کہ سپریم کورٹ دے فیصلے دے باوجود بانی پی ٹی آئی عمران خان دا شفا انٹرنیشنل ہسپتال وچ علاج نہیں کرایا گیا۔ لانگ مارچ دی قیادت اوہ آپ کرن گے تے لاکھاں لوکاں نوں اسلام آباد لے کے جان گے۔ سہیل آفریدی نے کارکنان نوں تیاری شروع کرن دی ہدایت کردیاں آکھیا کہ 27 ستمبر نوں کامیاب ہو کے واپس آواں گے۔

ایس توں پہلاں ہنگو دے ابوبکر صدیق چوک اُتے سٹریٹ موومنٹ دے شرکا نوں خطاب کردیاں سہیل آفریدی نے آکھیا کہ عمران خان نال متعلق عدالتی فیصلے نوں حکومت نے ردی دی ٹوکری وچ سُٹ دِتا اے۔ اک واری فیر کجھ لوکاں نے ثابت کر دِتا اے کہ اوہ آئین تے قانون توں بالاتر نیں۔

اُنہاں آکھیا کہ ساڈے خلاف کوئی ادارہ حکم دیندا اے تاں اک گھنٹے وچ اوہدے اُتے عمل ہو جاندا اے، پر اپنے آپ نوں بالاتر سمجھَن والے لوکاں نے عدالتی فیصلے اُتے عمل نہیں کیتا۔

سہیل آفریدی نے آکھیا کہ جے طاقتوراں نوں سزاں نہیں دِتیاں جا سکدیاں تاں کمزور قیدیاں نوں وی آزاد کر دِتا جاوے۔ ایہ نہیں ہو سکدا کہ اک ملک وچ کمزور لئی وکھرا تے طاقتور لئی وکھرا قانون ہووے۔

اُنہاں آکھیا کہ عمران خان دی جدوجہد دا مقصد کمزور تے طاقتور لئی اک برابر قانون اے۔ سانوں سوچنا پئے گا کہ اسی ملک نوں کدھر لے کے جا رہے آں، جدوں کسان تے صنعتکار پریشان نیں۔