فیلڈ مارشل نوں امریکا تے ایران دا اعتماد حاصل اے: نجم سیٹھی
زیراعظم نہیں، وزیرِ داخلہ ایران جان گے، عاصم منیر IRGC نال وی گل کرن گے، ن لیگ مسائل نہ نمٹائی تاں وزیراعظم دی چھٹی: نجم سیٹھی
لاہور (مانیٹرنگ ڈیسک) سینئر تجزیہ کار نجم سیٹھی نے آکھیا اے کہ فیلڈ مارشل عاصم منیر وفد لے کے ایران جا رہے نیں، کیوں جو انہاں دے بغیر اتھے کوئی پکی گل نہیں ہو سکدی۔ اُنہاں دا کہنا اے کہ فیلڈ مارشل نوں ایران تے امریکا دوناں دی حمایت تے اعتماد حاصل اے۔
اُنہاں آکھیا کہ وزیرِ داخلہ محسن نقوی وی نال ہون گے، جدویں وزیراعظم شہباز شریف ایران نہیں جان گے۔ دنیا نیوز دے پروگرام “اج دی گل سیٹھی دے نال” وچ گل بات کردیاں نجم سیٹھی نے آکھیا کہ حقیقت ایہ اے کہ وزیراعظم شہباز شریف دی گل وچ اوہنا وزن نہیں ہوندا جتنا فیلڈ مارشل دی گل وچ ہوندا اے۔
اُنہاں مطابق امریکا تے ایران دوناں نوں فیلڈ مارشل اُتے اعتماد اے کہ ایہ سیدھی گل کرن والے بندے نیں، دھوکا نہیں دیندے، جو آکھن گے اوہی کرن گے، تے جو وعدہ کرن گے اوہ پورا کرن گے۔
نجم سیٹھی نے آکھیا کہ عاصم منیر ایران جا کے IRGC نال وی گل بات کرن گے۔ اُنہاں آکھیا کہ میرے کول کوئی خبر نہیں، پر میرا خیال اے کہ اوہ سپریم لیڈر نال ملاقات نہیں کرن گے، کیوں جو ایران ہُن تک ایس اُتے تیار نہیں۔ سپریم لیڈر خفیہ مقام اُتے نیں، ایس لئی فیلڈ مارشل نوں اتھے لے کے جانا پئے گا تے امریکا تے اسرائیل اوہ مقام مانیٹر کر رہے ہو سکدے نیں۔
آصف زرداری دے ایوانِ صدر توں چلے جان دیاں خبراں بارے نجم سیٹھی نے آکھیا کہ ایہ ساریاں افواہاں نیں تے اِنہاں وچ کوئی صداقت نہیں۔ اُنہاں آکھیا کہ ایہ سوال ہی پیدا نہیں ہوندا کہ زرداری آپ ایوانِ صدر توں جان یا انہاں نوں کڈھ دِتا جاوے۔
نجم سیٹھی نے آکھیا کہ زرداری نے پہلاں ای 26ویں تے 27ویں ترمیم اُتے انگوٹھا لا دِتا سی۔ 27ویں ترمیم اُتے اوہ اپنی گل منوا سکدے سن، پر اوہدوں اوہناں دی گل نہیں منی گئی۔ ہُن اوہ کوشش کر رہے نیں کہ 28ویں ترمیم اُتے کوئی لین دین ہو جاوے۔
اُنہاں مطابق اصل معاملہ سندھ دے سٹیٹس تے این ایف سی ایوارڈ دے سٹیٹس دا اے۔ زرداری ایس گل توں انکار کر رہے نیں، جدویں دوجے پاسے اسٹیبلشمنٹ ضد کر رہی اے کہ ایہ کم کروانا اے۔ ایس وجہ نال 28ویں ترمیم آؤن وچ تاخیر ہوئی اے، کیوں جو ایس وچ لوکل گورنمنٹ تے نویں صوبیاں دا معاملہ وی شامل اے۔
نجم سیٹھی دے مطابق نواں صوبے بناؤن دے معاملے اُتے پیپلز پارٹی راضی نہیں، ایس وجہ نال معاملہ اٹک گیا اے۔ اُنہاں آکھیا کہ ایس صورتحال وچ زرداری نے ایہ دھمکی دِتی کہ اوہ ایوانِ صدر چھڈ دین گے، تے ایس وجہ نال صدر زرداری نے ایہ خبریں چلوا کے اک پیغام دین دی کوشش کیتی۔
اُنہاں آکھیا کہ جے ووٹاں لئی حکومت پی ٹی آئی نوں نال ملا لیندی اے تاں پیپلز پارٹی لئی مسئلہ پیدا ہو جاوے گا۔ فرض کرو زرداری ایوانِ صدر چھڈ دیندے نیں تاں اتحاد ختم ہو جاوے گا، ن لیگ دی حکومت چلی جاوے گی تے زرداری دے گورنر وی فارغ ہو جان گے۔
اُنہاں مزید آکھیا کہ جے پی ٹی آئی ن لیگ نوں سپورٹ نہیں کردی تاں وی مسئلہ بنے گا۔ پہلے ای ملک وچ مسائل نیں تے سیاسی عدم استحکام نال ہور مشکلات ودھ جان گیاں۔ جے ن لیگ ایہ سارے مسائل مینج نہیں کرے گی تاں شہباز شریف دی چھٹی ہو سکدی اے۔
