پنجاب حکومت دے مفت علاج اُتے 18 ارب توں ودھ خرچ3
پنجاب حکومت دے مفت علاج اُتے 18 ارب توں ودھ خرچ
لاہور (آئی این پی) پنجاب حکومت ولوں منتخب سرکاری تے نجی ہسپتالاں دے ذریعے مختلف خصوصی صحت پروگراماں دے تحت مریضاں نوں ہُن تک ساڑھے 18 ارب روپے توں ودھ مالیت دا مفت علاج فراہم کیتا جا چکیا اے۔
پنجاب حکومت دے خصوصی ڈائیلاسز پروگرام دے تحت ہُن تک 47 ہزار 404 مریضاں دا اندراج کیتا گیا اے، جدویں انہاں مریضاں نوں مجموعی طور اُتے 22 لاکھ توں ودھ، یعنی 22 لاکھ 10 ہزار 65 ڈائیلاسز پروسیجرز دی سہولت فراہم کیتی جا چکی اے۔
پروگرام دے تازہ ترین اعداد و شمار مطابق حکومتِ پنجاب نے منتخب ہسپتالاں نوں مریضاں دے علاج دے کلیمز دی مد وچ 11.656 ارب روپے وی ادا کیتے نیں۔ حکومت ولوں ڈائیلاسز دے مریضاں نوں مسلسل مفت علاج دی سہولت فراہم کیتی جا رہی اے، تاں جو انہاں نوں مہنگے طبی اخراجات دے بوجھ توں نجات دِتی جا سکے۔
صوبائی وزیرِ صحت خواجہ سلمان رفیق نے آکھیا کہ پنجاب وچ صحت دے شعبے وچ تاریخی تے بنیادی نوعیت دے اقدامات کیتے جا رہے نیں۔ حکومت عوام نوں صحت دیاں بہترین سہولتاں دی فراہمی لئی بھرپور اقدامات کر رہی اے۔
اُنہاں آکھیا کہ پنجاب دے عوام نوں معیاری تے بہترین طبی سہولتاں فراہم کرن لئی سارے وسائل بروئے کار لیائے جا رہے نیں، تے حکومت صحت دے شعبے وچ اصلاحات تے خصوصی پروگراماں دا دائرہ ہور وسیع کرن لئی پُرعزم اے۔
