امریکی ثالثی وچ شام تے اسرائیل دے اردن وچ اعلیٰ سطح مذاکرات، اسرائیلی حملے روکن دے طریقہ کار اتے گفتگو

امریکی ثالثی وچ شام تے اسرائیل دے اردن وچ اعلیٰ سطح مذاکرات ہوئے نیں، جیدی لوچ شام وچ اسرائیل دے پچھلے حملیاں مگروں پیدا ہون آلی کشیدگی نوں گھٹ کرنا سی۔

شامی سرکاری خبر رساں ایجنسی دے مطابق شامی وزیرِ خارجہ اسعد الشیبانی تے انٹیلی جنسس دے سربراهاں دی اردن وچ اسرائیل دے اعلیٰ سطح وفد نال ملاقات ہوئی اے۔

شامی سرکاری خبر رساں ایجنسی دے مطابق ملاقات وچ امریکہ نے ثالثی دا کردار ادا کیتا، شام تے اسرائیلی وفود دی ملاقات پچھلے اسرائیلی حملیاں مگروں کشیدگی گھٹ کرن لئی ہوئی۔

خبر رساں ایجنسی دا کہنا اے کہ مذاکرات وچ اسرائیلی حملے، گرفتاریاں تے ٹارگٹڈ کارروائیاں روکن دے طریقہ کار اتے گل بات کیتی گئی۔

خبر رساں ایجنسی دے مطابق شام نے اک واری پھر اپنا موقف دوہرایا اے کہ گولان دیاں پہاڑیاں مقبوضہ شامی علاقہ نیں، گولان دیاں پہاڑیاں دی حتمی حثیت اتے گل بات کرنا ہجے کچی گل اے۔

شامی حکام دا کہنا اے کہ ہݨ سب توں پہلی ترجیح اسرائیلی فوجیاں دا 8 دسمبر 2024 توں پہلاں والیاں پوزیشنز تک پچھے ہٹنا تے 1974 دے سمجھوتے اتے عملدرآمد کرنا اے۔

اس توں پہلاں غیر ملکی خبر رساں ایجنسی رائٹرز نے دعویٰ کیتا سی کہ اسرائیل دی خفیہ ایجنسی موساد دے سربراہ رومن گوفمین نے پچھلے دناں شام دے وزیر خارجہ اسعد الشیبانی نال فون اتے رابطہ کیتا سی۔

خبر رساں ایجنسی دے مطابق ایہ ٹیلی فونک گل بات 14 اگست نੂੰ سی جیدے وچ موساد سربراہ نے شام وچ ترکیے دی فوجی موجودگی اتے پوری تفصیل نال تبادلہ خیال کیتا۔