قطر پاکستان وچ سرمایہ کاری دے موقعیاں توں فائدہ چکے: چیئرمین سینیٹ
اعلیٰ سطح قطری وفد دی یوسف رضا گیلانی نال ملاقات، سماجی تے سیاسی تعاون اُتے تبادلۂ خیال
اسلام آباد (اپنے رپورٹر توں) چیئرمین سینیٹ سید یوسف رضا گیلانی نال قطر دے اعلیٰ سطح دے وفد نے ملاقات کیتی، جِس دی قیادت قطر دے شاہی خاندان دے سینئر رکن، شیخ نایف بن عید آل ثانی نے کیتی۔
چیئرمین سینیٹ نے آکھیا کہ دوطرفہ تعلقات نوں ہور وسعت دین لئی تجارت، سرمایہ کاری تے سماجی و سیاسی تعاون نوں فروغ دین دی لوڑ اے۔ انہاں مسلم ممالک دے درمیان اتحاد، امن تے استحکام دے فروغ وچ مکہ معاہدے دی اہمیت نوں اجاگر کیتا۔
انہاں شیخ نایف بن عید آل ثانی دی کاروباری بصیرت تے پاکستان تے قطر دے درمیان مضبوط معاشی تے تجارتی روابط دے فروغ وچ انہاں دے کردار نوں وی خراجِ تحسین پیش کیتا۔
چیئرمین سینیٹ نے قطری سرمایہ کاراں نوں پاکستان وچ سرمایہ کاری دے موقعیاں توں فائدہ چکن دی دعوت دِتی تے آکھیا کہ ایتھے سیاحت، زراعت، توانائی تے ہور شعبیاں وچ سرمایہ کاری دے وسیع امکانات موجود نیں۔
شیخ نایف بن عید آل ثانی نے پرتپاک میزبانی اُتے شکریہ ادا کیتا تے امن، مکالمے، ترقی تے علاقائی تعاون دے فروغ وچ پاکستان دے کردار نوں سراہیا۔ انہاں آکھیا کہ مکہ معاہدہ خطے وچ ہور استحکام، سلامتی تے مسلم دنیا دے اتحاد دے فروغ وچ معاون ثابت ہووے گا۔
قطری وفد نے پاکستان وچ سرمایہ کاری دے موقعے تلاش کرن وچ گہری دلچسپی دا اظہار وی کیتا۔
