مکہ معاہدہ دفاعی تعاون، معاشی روابط ودھاوے گا: سردار مسعود خان
اسلام آباد (این این آئی) امریکا، چین تے اقوامِ متحدہ وچ پاکستان دے سابق سفیر تے آزاد کشمیر دے سابق صدر سردار مسعود خان نے آکھیا اے کہ مکہ مشترکہ دفاعی معاہدہ پاکستان، سعودی عرب تے ترکیہ دے درمیان سٹرٹیجک ہم آہنگی دے ذریعے اجتماعی دفاعی صلاحیت دی بنیاد فراہم کردا اے۔
ایس معاہدے دے تحت عملی دفاعی تعاون دے نال نال معاشی روابط نوں وی فروغ دِتا جاوے گا۔ سنٹر فار لا اینڈ سکیورٹی وچ مکہ مشترکہ دفاعی معاہدے اُتے اظہارِ خیال کردیاں سردار مسعود خان نے آکھیا کہ ایہ معاہدہ محض اک اعلانیہ دستاویز نہیں، بلکہ ایس دے تحت تیناں ملکاں دے درمیان سانجھیاں فوجی مشقاں، تربیت تے دفاعی تعاون لئی عملی صلاحیتاں تے ادارہ جاتی نظام تشکیل دِتا جاوے گا۔
انہاں آکھیا کہ معاہدے وچ دفاعی سازوسامان دی خریداری وچ تعاون دے علاوہ سانجھی دفاعی پیداوار وی شامل اے، جِس نال تیناں ملکاں دیاں مقامی دفاعی صلاحیتاں نوں ہور مضبوط کرن وچ مدد مل سکدی اے۔
سردار مسعود خان نے آکھیا کہ پاکستان نوں اپنے سلامتی تے معاشی تقاضیاں دا سامنا اے، سعودی عرب اپنی سلامتی دیاں شراکت داریاں نوں ہور مضبوط تے متنوع بنا رہیا اے، جدوں کہ ترکیہ علاقائی تے عالمی سلامتی دے ماحول وچ اک اہم سٹرٹیجک مقام رکھدا اے۔
