رائے ونڈ وچ اہم بیٹھک، سیاسی تے قانونی حکمتِ عملی اُتے مشاورت، پاکستان ہور کسے بحران دا متحمل نہیں ہو سکدا: نواز شریف
شہباز شریف دی صدر (ن) لیگ نال ملاقات 2 گھنٹے جاری رہی، مریم نواز وی موجود، پی ٹی آئی دی توہینِ عدالت درخواست تے ایس دے قانونی جواب بارے تبادلہ خیال
تمام معاملات نوں سیاسی تے آئینی دائرہ کار وچ رہندیاں اگے ودھانا ضروری اے: نواز شریف، وزیراعظم نے عمران دے پمز وچ طبی معائنے دیاں وجوہات توں وی آگاہ کیتا: ذرائع
لاہور وزیراعظم محمد شہباز شریف نے پاکستان مسلم لیگ (ن) دے صدر میاں نواز شریف نال گزشتہ روز جاتی امرا رائے ونڈ وچ اہم ملاقات کیتی، وزیراعلیٰ پنجاب مریم نواز شریف وی موجود سن۔ ایس موقعے اُتے ملک دی مجموعی صورتحال، پی ٹی آئی ولوں توہینِ عدالت دی درخواست تے ایس دے قانونی جواب بارے سیاسی تے قانونی حکمتِ عملی اُتے تبادلہ خیال تے مشاورت کیتی گئی۔
ذرائع دے مطابق صدر ن لیگ نواز شریف نے آکھیا کہ پاکستان ہور کسے سیاسی تے آئینی بحران دا متحمل نہیں ہو سکدا، ایس لئی سارے معاملات نوں سیاسی تے آئینی دائرہ کار وچ رہندیاں اگے ودھانا ضروری اے۔
تفصیلات دے مطابق وزیراعظم شہباز شریف دی مسلم لیگ (ن) دے صدر نواز شریف نال جاتی امرا رائے ونڈ وچ ہون والی ملاقات تقریباً دو گھنٹے تک جاری رہی۔ ملاقات وچ ملکی سیاسی صورتحال تے پارٹی امور بارے وی تبادلہ خیال کیتا گیا، جدوں کہ آزاد کشمیر دی سیاسی صورتحال تے اتھے نویں وزیراعظم دے انتخاب لئی متوقع امیدواراں شاہ غلام قادر تے طارق فاروق دے ناں اُتے غور کیتا گیا۔
پارٹی قیادت دی مشاورت مکمل ہون توں بعد آزاد کشمیر دے نویں وزیراعظم دے ناں دا باضابطہ اعلان جلد متوقع اے۔ ملاقات دی اندرونی کہانی وی سامنے آ گئی اے۔
ذرائع دے مطابق دو گھنٹے طویل ملاقات دے ایجنڈے وچ سب توں اہم سپریم کورٹ ولوں بانی پی ٹی آئی نوں ہسپتال منتقل کرن دا فیصلہ سی۔ وزیراعظم نے نواز شریف نوں بانی پی ٹی آئی نوں شفا ہسپتال دی بجائے پمز وچ چیک اَپ کراؤن دیاں وجوہات توں آگاہ کیتا۔ ملاقات وچ سیاسی حکمتِ عملی تے قانونی آپشنز اُتے وی مشاورت کیتی گئی۔
