میر رضا قتل کیس: جوڈیشل کمیشن بناؤن دا فیصلہ، وارثاں دا انکار

چیف جسٹس ہائیکورٹ توں کمیشن بناؤن دی درخواست کران گے، ترجمان وزیراعلیٰ، اسی جے آئی ٹی بناؤن دی گل کیتی سی، اج ہائی کورٹ جاواں گے، والدین

کراچی (مانیٹرنگ ڈیسک، خبر ایجنسیاں) سندھ حکومت نے نوجوان تاجر میر رضا علی خان دی ہلاکت دے معاملے وچ غیر جانبدار تے شفاف تحقیقات لئی جوڈیشل کمیشن دے قیام دا فیصلہ کر لیا اے، جدوں کہ مقتول دے وارثاں نے ایہ فیصلہ مسترد کر دِتا اے۔

ترجمان وزیراعلیٰ دے مطابق وزیراعلیٰ نے اہلِ خانہ نال دلی ہمدردی تے یکجہتی دا اظہار کردیاں آکھیا اے کہ سندھ ہائیکورٹ دے چیف جسٹس توں جوڈیشل کمیشن تشکیل دی درخواست کیتی جاوے گی۔

مقتول دے والدین نے شدید تحفظات دا اظہار کردیاں آکھیا کہ جوڈیشل کمیشن دے حوالے نال ساڈے نال کوئی مشاورت نہیں کیتی گئی۔ قتل کیس دی تحقیقات جوڈیشل کمیشن دا کم نہیں اے۔

میر رضا دی بہن نے والد تے والدہ دے نال جاری ویڈیو بیان وچ آکھیا کہ جوڈیشل کمیشن بارے سانوں میڈیا توں پتا لگیا۔ پولیس نے 24 اگست تک اپنی رپورٹ جمع کرانی سی، پر رپورٹ ہن تک سامنے نہیں آئی۔ سوال اے کہ کس بنیاد اُتے ایہ کمیشن بنایا جا رہیا اے؟

اُنہاں آکھیا کہ اسی جے آئی ٹی بناؤن دی گل کیتی سی تے اسی اج سویرے ہائی کورٹ جاواں گے۔ اسی جوڈیشل کمیشن دی مخالفت کردے آں۔