راولپنڈی: دادو چھہ ڈیم اُتے 36 ارب دے پانی دی فراہمی تے ٹریٹمنٹ پلانٹ منصوبے دی منظوری
راولپنڈی (نیوز رپورٹر) حکومتِ پنجاب نے راولپنڈی لئی دادو چھہ ڈیم اُتے 36 ارب روپے دی لاگت نال سرفیس واٹر ٹریٹمنٹ پلانٹ تے واٹر سپلائی سسٹم دی تعمیر دے منصوبے دی منظوری دے دِتی اے۔
محکمہ ہاؤسنگ دے مطابق منصوبے دی تکمیل توں بعد راولپنڈی دے واٹر سپلائی نیٹ ورک وچ روزانہ 35 ملین گیلن ہور ٹریٹڈ پانی شامل کیتا جاوے گا۔
محکمہ ہاؤسنگ دے مطابق منصوبہ دسمبر 2029 تک مکمل کیتا جاوے گا۔ منصوبے دا مقصد راولپنڈی وچ پین والے پانی دیاں طویل مدتی ضروریات پوری کرن لئی سرفیس واٹر دے مؤثر تے پائیدار ذریعے نوں جدید ٹریٹمنٹ تے ڈسٹری بیوشن انفراسٹرکچر نال منسلک کرنا اے۔
منصوبے دے تحت واٹر سپلائی انفراسٹرکچر دی تعمیر واسا راولپنڈی کرے گا۔ دادو چھہ ڈیم دی تکمیل توں بعد واسا ٹرانسمیشن لائن تے ڈسٹری بیوشن نیٹ ورک وی تعمیر کرے گا، جس دے ذریعے ٹریٹڈ پانی راولپنڈی شہر دے موجودہ واٹر سپلائی نظام وچ شامل کیتا جاوے گا۔
ترجمان دے مطابق سیکرٹری ہاؤسنگ نے واسا راولپنڈی دے ڈپٹی منیجنگ ڈائریکٹر سہیل اسلم نوں ایس منصوبے دا پراجیکٹ ڈائریکٹر مقرر کر دِتا اے۔ اُنہاں نوں تمام متعلقہ محکماں تے اداریاں وچ مؤثر رابطہ یقینی بناؤن تے منصوبے اُتے پیش رفت دی قریبی نگرانی دی ہدایت کیتی گئی اے۔ نال ای آکھیا گیا اے کہ منظور شدہ ٹائم لائن اُتے سختی نال عملدرآمد کیتا جاوے۔
روزانہ 35 ملین گیلن ہور صاف پانی دی فراہمی نال راولپنڈی دے موجودہ واٹر سپلائی نظام نوں تقویت ملے گی تے شہریاں لئی پین والے پانی دی فراہمی نوں ہور قابلِ اعتماد بناؤن وچ مدد ملے گی۔
