توہینِ عدالت : سپریم کورٹ وچ 16 ستمبر نوں سماعت

عظمیٰ دی جلدی سماعت دی استدعا رد، مرکزی کیس دے نال سماعت ہووے گی: سپریم کورٹ سنن والے سن رہے نے تاں سپریم کورٹ دے حکم تے ہن وی عمل ہو سکدا اے: گوہر

اسلام آباد سپریم کورٹ نے بانی پی ٹی آئی نوں شفا ہسپتال منتقل نہ کرن تے عمران خان دی بھین عظمیٰ خان ولوں وزیراعظم شہباز شریف، وزیر قانون اعظم نذیر تارڑ تے وزیر اطلاعات عطا تارڑ سمیت دوجیاں دے خلاف توہینِ عدالت دی درخواست 16 ستمبر لئی مقرر کر دتی اے۔ لہور ہائی کورٹ تے سپریم کورٹ دے رجسٹرار آفس ولوں لائے گئے اعتراضات نوں پی ٹی آئی ولوں دور کرن توں بعد درخواست نوں نمبر 8/2026 الاٹ کیتا گیا اے۔

اس توں بعد عظمیٰ خان نے بانی دی خراب ہوندی صحت دا حوالہ دے کے جلدی سماعت دی درخواست دائر کیتی، پر سپریم کورٹ نے ایہ استدعا رد کر دتی۔ عدالت نے قرار دتا کہ پالیسی مطابق توہینِ عدالت دی درخواست نوں مرکزی مقدمے دے نال ہی 16 ستمبر نوں سنیا جاوے گا تے مقررہ تاریخ توں پہلے سماعت نہیں ہو سکدی۔

سپریم کورٹ دے باہر میڈیا نال گل بات کردیاں چیئرمین پی ٹی آئی بیرسٹر گوہر نے آکھیا کہ بانی نوں ہسپتال منتقل کرن دا پلان آخری ویلے تبدیل کیتا گیا جیہدے نال ساڈیاں کوششاں تے پانی پھیر دتا گیا۔ اوہناں آکھیا کہ پمز وچ مطلوبہ علاج نہیں ہویا تے بانی دی صحت تے سیاست نہیں ہونی چاہیدی۔ گوہر نے ہور آکھیا کہ سپریم کورٹ دے حکم تے ہن وی عمل ہو سکدا اے، جے سنن والے سن رہے نے تاں اوہ عمل کرن۔