پاکستان تے سعودیہ وچ مشترکہ تعاون دا ایہہ بہترین ویلا اے: وزیر اعظم
اسلام آباد (نامہ نگار) وزیر اعظم شہباز شریف نال سعودی پاک مشترکہ بزنس کونسل دے چیئرمین شہزادہ منصور بن محمد آل سعود دی قیادت وچ اعلیٰ سطح دے سعودی کاروباری وفد نے وزیراعظم ہاؤس وچ ملاقات کیتی۔
وزیر اعظم نے خادم الحرمین الشریفین شاہ سلمان بن عبدالعزیز آل سعود تے ولی عہد و وزیراعظم شہزادہ محمد بن سلمان بن عبدالعزیز آل سعود لئی دلی احترام تے نیک خواہشات دا اظہار کیتا۔ سعودی وفد دا خیرمقدم کردیاں وزیر اعظم نے آکھیا کہ ولی عہد محمد بن سلمان دے وژن مطابق پاکستان سعودی عرب نال اپنے اقتصادی تعلقات نوں باہمی مفاد تے مبنی سٹریٹجک اقتصادی شراکت داری وچ بدلن دا خواہاں اے۔ وزیر اعظم نے شہزادہ منصور بن محمد آل سعود دے پاکستان دے پہلے دوریاں دا وی ذکر کیتا تے امید ظاہر کیتی کہ اوہناں دا موجودہ دورہ پچھلی بات چیت نوں اگے ودھان تے وکھ وکھ شعبیاں وچ مفاہمتی یادداشتاں تے معاہدیاں تے دستخط دی راہ ہموار کرے گا۔
شہزادہ منصور بن محمد آل سعود نے زراعت، بندرگاہواں، شاہراہواں، ہوائی اڈیاں دی آؤٹ سورسنگ، رئیل اسٹیٹ، توانائی، بجلی دی تقسیم تے انفارمیشن ٹیکنالوجی دے شعبیاں وچ سرمایہ کاری دے موقعیاں وچ دلچسپی دا اظہار کیتا۔
وزیر اعظم نے ایہناں ترجیحی شعبیاں وچ سعودی سرمایہ کاری دی دلچسپی دا خیرمقدم کردیاں آکھیا کہ دوہاں دیساں وچالے مشترکہ تعاون، چاہے حکومت توں حکومت ہووے یا کاروبار توں کاروبار، ایہدے لئی ایہہ بہترین تے موزوں ترین ویلا اے۔
شہزادہ منصور بن محمد آل سعود نے پرتپاک استقبال تے وزیر اعظم دا شکریہ ادا کیتا تے پاکستان نال کاروباری تعلقات نوں ہور ڈونگھا کرن وچ سعودی حکومت تے سعودی کاروباری برادری دی مسلسل دلچسپی دا اعادہ کیتا۔ ملاقات وچ رانا تنویر حسین، ڈاکٹر مصدق ملک، جام کمال خان، محمد اورنگزیب، عطااللہ تارڑ، جنید انوار، علی پرویز ملک، سردار اویس لغاری، حنیف عباسی، محمد علی، ہارون اختر، بلال اظہر کیانی، طارق فاطمی تے ہور اعلیٰ حکام وی موجود سن۔
