مریم نواز چین اپڑ گئیاں، ملاقاتاں، تعاون ودھاؤݨ تے اتفاق

ارومچی وچ پرتپاک استقبال، سنکیانگ دے تجربیاں توں فائدہ چکنا چاہنے آں: آئی جی پنجاب نوں بدعنوان بندیاں دی چھانٹی لئی اک ہفتے دی مہلت

لاہوروزیراعلیٰ پنجاب مریم نواز 4 دن دے سرکاری دورے تے چین اپڑ گئیاں نے، جِتھے چینی صوبے سنکیانگ دے حکام نال ملاقاتاں وچ وکھ وکھ شعبیاں وچ تعاون ودھاؤݨ تے اتفاق کیتا گیا اے۔ اس توں پہلے وزیراعلیٰ نے بدعنوان عناصر دے خلاف سخت کارروائی دا اعلان کردیاں آئی جی پنجاب نوں کرپٹ اہلکاراں دی چھانٹی لئی اک ہفتے دی ڈیڈ لائن دے دتی اے۔

تفصیلات مطابق وزیراعلیٰ مریم نواز اپنے وفد نال سنکیانگ دے دارالحکومت ارومچی دے بین الاقوامی ایئرپورٹ اپڑیاں تاں چینی عہدیداراں نے اوہناں دا پرتاپک استقبال کیتا۔ اوہناں نے شن جیانگ سٹیٹ گیسٹ ہاؤس وچ سنکیانگ دے پارٹی سیکرٹری چن شیاؤجیانگ تے دیگر اعلیٰ حکام نال ملاقات کیتی، جیہدے وچ زراعت، آبپاشی تے لائیو سٹاک دے شعبیاں وچ شراکت داری نوں ودھاؤݨ تے اتفاق کیتا گیا۔ وزیراعلیٰ نے آکھیا کہ پنجاب زرعی پیداوار لئی پاکستان دا سب توں وڈا صوبہ اے تے اسیں کارپوریٹ فارمنگ تے نویں ٹیکنالوجی وچ سنکیانگ دے تجربیاں توں فائدہ چکنا چاہنے آں۔

چین روانگی توں پہلے لاہور وچ اک اعلیٰ سطح دے اجلاس دی صدارت کردیاں وزیراعلیٰ نے امن و امان دا جائزہ لیا۔ اجلاس وچ ڈولفن پولیس دا کنٹرول متعلقہ تھانے نال جوڑن، پنجاب پولیس نوں باڈی کیمرے دیݨ لئی 30 ستمبر دی ڈیڈ لائن طے کرن، تے قیدی ویناں وچ جی پی ایس تے کیمرے لاؤݨ دی منظوری دتی گئی۔ وزیراعلیٰ نے واضح کیتا کہ کرپٹ پولیس افسراں نوں ایس ایچ او نہ لا یا جاوے تے آکھیا کہ “بچے تے زنانیاں میری ریڈ لائن نے، اوہناں دے خلاف جرائم معاف نہیں کیتے جان گے۔”