سینیٹ : بانی پی ٹی آئی دی صحت تے حکومت تے اپوزیشن وچالے نوک جھوک

لمے عرصے توں بعد احتجاج، بائیکاٹ تے واک آؤٹ توں بغیر ایوان دی کارروائی جاری رہی، دوہاں پاسیاں توں اک دوجے تے الزاماں، تنقید تے تلخی دے باوجود ایجنڈا مکمل

اسلام آباد (اپنے رپورٹر توں) ایوانِ بالا (سینیٹ) وچ اپوزیشن ولوں کورم دی نشاندہی دے ڈر پاروں حکومتی ارکان نے اپنی حاضری پکی کیتی تاں جو کورم ٹٹ نہ سکے، جیہدے وچ حکومت کامیاب رہی۔ اجلاس دوران اپوزیشن تے حکومتی ارکان وچالے نوک جھوک جاری رہی تے دوہاں پاسیاں توں اک دوجے تے طنز تے تنقید کیتی گئی، پر لمے عرصے توں بعد ایوان دا ماحول مجموعی طور تے خوشگوار ریا تے بغیر کسے احتجاج، بائیکاٹ یا واک آؤٹ دے کارروائی جاری رہی تے دن دا ایجنڈا مکمل کر لیا گیا۔

بانی پی ٹی آئی دی صحت دے معاملے تے پی ٹی آئی دی سینیٹر مشعال تے سینیٹر عبدالقادر نے حکومت نوں تنقید دا نشانہ بناندے ہوئیاں آکھیا کہ نواز شریف نوں جیل وچ علاج دی ہر سہولت ملدی سی تے اوہناں نوں ہسپتال وی لے جایا جاندا سی۔ ایس تے مسلم لیگ (ن) دے سینیٹر ناصر بٹ نے آکھیا کہ پی ٹی آئی بانی دی صحت تے سیاست کر رہی اے تے جھوٹھ بول رہی اے۔ ناصر بٹ دے جواب تے پی ٹی آئی تے حکومتی ارکان اپنیاں سیٹاں توں اک دوجے دے خلاف بولن لگ پئے۔ اجلاس دوران پی ٹی آئی دی ایک سینیٹر اک وار پھر بانی پی ٹی آئی دی تصویر چک کے لے آئیاں تے اپنے اگے رکھ دتی۔